თბილისის მერმა დავით ნარმანიამ, დღეს, 6 მაისს გამართულ ბრიფინგზე განაცხადა, რომ ქალაქის ქაოტური განაშენიანებისა და დაურეგულირებელი მშენებლობების წინააღმდეგ მერია კონკრეტულ ნაბიჯებს გადადგამს. მისვე თქმით, თბილისის ტერიტორიების გამოყენებისა და განაშენიანების რეგულირების წესებში ცვლილება შევა და საკრებულოს დასამტკიცებლად დღესვე გადაეგზავნება:

"ჩვენ მივიღეთ გადაწყვეტილება, რომლის თანახმადაც, ქალაქის ცენტრალურ ნაწილში წესდება დროებითი შეზღუდვა საცხოვრებელ სახლებზე კ2 კოეფიციენტის გაზრდასთან დაკავშირებით, რაც საშუალებას მოგვცემს, შევცვალოთ წლების განმავლობაში დამკვიდრებული მანკიერი პრაქტიკა - თბილისის ცენტრალური და ისტორიული ნაწილის ქაოტური განაშენიანება, ისედაც მჭიდრო დასახლებებში“.

ნარმანიას განცხადებით, ქალაქის განაშენიანების ცივილურ წესებს დაადგენენ, რაც დედაქალაქის მთავრობას თბილისში ქაოტური მშენებლობების დარეგულირების შესაძლებლობას მისცემს.

მერის თქმით, სხვა უბნებს დროებითი შეზღუდვა არ შეეხება, რათა გარეუბნებს განვითარების საშუალება მიეცეს.

თბილისის მერმა ასევე განაცხადა, რომ თბილისის გამწვანება მერიის პრიორიტეტია და ამ მიმართულებითაც ძალიან კონკრეტული ნაბიჯები გადაიდგმება. კერძოდ, იმ გამწვანებულ ტერიტორიებზე, რომლებიც საცხოვრებელ ზონებში ხვდება, განაშენიანება შეიზღუდება:

"ქალაქში აქტიური უნდა გახდეს მწვანე სახურავების თემა, შესაბამისად, მშენებლობის პროცესში მწვანე სახურავებისა და ტერასების განვითარება დედაქალაქის მთავრობისგან წახალისებული იქნება სხვადასხვა ფორმით. დაადგენენ სახურავების ერთიან სტანდარტს, რათა ქალაქის გადმოსახედები იყოს ერთიანი და არ იყოს ამოვარდნილი საერთო კონცეფციიდან".