"გაჩერდიო მითხრა, თორემ მე შენ ვერ დაგიცავო", — ასე პასუხობს დეპუტატი ეკა ბესელია გადაცემა რეაქციის წამყვანის, ინგა გრიგოლიას კითხვას, გავრცელდა თუ არა პირადი ცხოვრების ამსახველი კადრები ბიძინა ივანიშვილის ბრძანებით. ბესელია ამბობს, რომ ეს იყო მრავლისმეტყველი ფრაზა და შესაძლოა, გაფრთხილებაც.

დეპუტატი უარს ამბობს ამ საუბრის სხვა დეტალებზე ისაუბროს და აცხადებს, რომ ისტორიას მაშინ გააგრძელებს, როცა საჭირო გახდება. ნახეთ ეკა ბესელიას პასუხი:

"ახლა გეტყვით, პირველად, ერთ ამბავს, ერთ ფრაზას, რომელიც შეიძლება იყოს მრავლისმეტყველი. ეს კადრები გავრცელდა 27 იანვარს. ეს არის ის ღამე და დღე, როდესაც 2-დღიანი უმრავლესობის სხდომა ჩაატარა ივანიშვილმა სასამართლოსთან დაკავშირებულ თემაზე და ეს იყო უმწვავესი საუბარი შიგნით.

ეს კადრები გავრცელდა [მას შემდეგ] ზუსტად ის მძიმე ორდღიანი სხდომა რომ დამთავრდა, სადაც მე საკმაოდ მწვავე საუბარი მქონდა. იმ ღამეს გავფრინდი მივლინებაში და ზუსტად იმ ღამეს გავრცელდა ეს კადრები. მე ჩამოვედი, ივანიშვილს შევხვდი. მკითხა, რაიმე ეჭვი ხომ არ გაქვს ჩვენზეო. ვუთხარი, მე ვარ ის ადამიანი, ვისაც ყველაზე მეტად არ უნდა, მართლა არ მინდა ამის ბოლოდე დაჯერება, რომ შეიძლება ეს მოხდა შენი თანხმობით-თქო. წარმოიდგინეთ, მე ვარ ის ადამიანი, რომელმაც მასთან ერთად შვიდი წელი გაიარა ეს გზა. ზარდიაშვილივით კი არ ვხტებოდი იქიდან-აქეთ და ოხანაშვილივით, რომელიც 2016-ში შემოახტა ამ ოცნების ვაგონს.

ჩემთვის ძალიან მძიმე დასაჯერებელი იქნება, შეიძლება რაღაც ეჭვები მქონდეს შინაგანად, მაგრამ... ამიტომ, მე ამის დაჯერება მიჭირს-მეთქი. მითხრა ამ ამბავმა მე უფრო დამაზარალა, ვიდრე შენო და ეს ნაციონალების გაკეთებულიაო. მე ვუთხარი გახსენით ეს საქმე და დამიდეთ კონკრეტული პირი ან პირები, სახელი და გვარი, ვინ ჩაიდინა იმიტომ, რომ ეს ემთხვევა სასამართლოსთან დაწყებულ კონფლიქტს. მითხრა კიო, ეს გაიხსნებაო. მაგრამ ამას მოყვა შემდეგი ფრაზა მისგან და მე აქ გავჩერდები არ გავაგრძელებ დღეს, სხვა დროს გავაგრძელებ ამ საუბარს და სხვა საუბარსაც, თუ ამის აუცილებლობის წინაშე დავდგები. გაჩერდიო მითხრა, თორემ მე შენ ვერ დაგიცავო. ეს იყო მრავალმნიშვნელოვნად ნათქვამი სიტყვა იმიტომ, რომ მეორედაც გავრცელდა თუ გახსოვთ, ერთ თვეში. არ ვიცი ეს იყო გაფრთხილება, მინიშნება. ჩემი პასუხი იყო, რომ მე არავის დაცვა არ მჭირდება და იქეთ გიცავთ ყველას-თქო."

ამ საკითხზე ბესელიას თანაგუნდელს, გედევან ფოფხაძეს ნათქვამი აქვს, რომ შეუძლებელი იყო კადრები ივანიშვილის თანხმობის გარეშე გავრცელებულიყო. ბესელია კი ამბოდა, რომ ივანიშვილის პოლიტიკური ნება რომ იყოს, პირადი ცხოვრების კადრების გავრცელების საქმეს გამოიძიებდნენ.

22 ივნისს ეკა ბესელიამ რუსთავი 2-თან საუბარში განაცხადა, რომ ისევ პასუხგაუცემელია კითხვები, თუ ვინ არის ფარული ვიდეოკადრების ავტორი და მას აღარ აქვს იმედი, რომ საქმეზე გამოძიება დასრულდება. ბესელიას განცხადებით საპასუხოდ კი ინფრასტრუქტურის მინისტრმა, მაია ცქიტიშვილმა თქვა, რომ ქართული ოცნებიდან წასულ დეპუტატ ეკა ბესელიას მხრიდან პირად ცხოვრებაზე საუბარი "უკვე დამღლელია".

დეპუტატ ეკა ბესელიას საჯარო განცხადებიდან მეორე დღეს შინაგან საქმეთა სამინისტრომ პასუხისგებაში მისცა პირი, რომელმაც "დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა".

გამოძიების ვერსიით, ვიდეოჩანაწერი 2019 წლის იანვრის თვეში, მკვლელობისთვის მსჯავრდებულმა საქართველოს მოქალაქემ ინტერნეტით გაავრცელა სომხეთის რესპუბლიკიდან. შსს-ს განცხადებით, აღნიშნული კადრები ბრალდებულმა ფეისბუქის მესენჯერის საშუალებით, რუსეთის ფედერაციის მოქალაქისგან მიიღო.

გამოძიება ასევე ამტკიცებს, რომ კადრები ფარულად, უკანონოდ არის გადაღებული 2012 წლის მაისის თვეში, რისთვისაც 2016 წელს გასამართლებული არიან ყოფილი ხელისუფლების მაღალჩინოსნები.