2018 წელს მსოფლიოში აღიარებულმა თანამედროვე კანადელმა მწერალმა, მარგარეტ ეტვუდმა განაცხადა, რომ 1985 წელს გამოცემული თავისი საკულტო ნაწარმოების, მხევლის წიგნის გაგრძელება დაწერა.

მწერლის ერთგულმა მკითხველებმა მთელი მსოფლიოს მასშტაბით სიხარულის ზარები შემოსცხეს, თუმცა იყვნენ უფრო სკეპტიკოსებიც, რომლებსაც ფილმებისა თუ წიგნების გაგრძელებები ერთნაირად სძაგდათ, მაგრამ ფაქტი ერთია — ასეთი გახმაურებული წიგნის მოლოდინმა ლიტერატურული სამყარო გამოაცოცხლა.

მხევლის წიგნი დისტოპიური ჟანრის რომანია, რომელიც იმ პირქუშ მომავალს გვიხატავს, სადაც რელიგიური რადიკალიზმი ადამიანის თავისუფლების მნიშვნელობას არ სცნობს, განსაკუთრებით კი ქალების უფლებებს ლახავს უკიდურესად. 80-იან წლებში დაწერილი ეს ერთგვარი წინასწარმეტყველური გაფრთხილება გამორჩეულად აქტუალური ბოლო წლებში, მსოფლიოს არაერთ ქვეყანაში პოლიტიკურ ასპარეზზე გააქტიურებული მკვეთრად მემარჯვენე და კონსერვატიული ღირებულებების მქონე ძალების ფონზე გახდა. განსაკუთრებული მნიშვნელობა ამ წიგნმა ამერიკაში ტრამპის გაპრეზიდენტების შემდეგ შეიძინა, რომლის საკმაოდ აშკარა სექსისტურმა, რასისტულმა თუ ჰომოფობიურმა მოსაზრებებმა ქალების მასშტაბურ აქციებსაც კი ჩაუყარა საფუძველი.

ამ უდაოდ ღირებულ წიგნს ახალი სიცოცხლე სატელევიზიო ეკრანიზაციამ შთაბერა: Hulu-ს 2017 წელს გამოსულმა სერიალმა მილიონობით მაყურებელი მიიზიდა, ხოლო მოგვიანებით არაერთი მნიშვნელოვანი ჯილდოს მფლობელიც გახდა.

ფოტო: Andy Rain / EPA

სულ ცოტა ხნის წინ კი, 2019 წლის 10 სექტემბერს სწორედ ამ წიგნის გაგრძელება გამოქვეყნდა: სიქველს The Testaments ჰქვია და მხევლის წიგნის ისტორიიდან თხუთმეტი წლის შემდგომ ვითარებაზე მოგვითხრობს. ამჯერად წიგნის ნარატორი არა მხევლად ქცეული სასოწარკვეთილი ჯუნი, არამედ სხვა სამი ქალია, მათ შორის კი ერთ-ერთი ბევრი მკითხველისა თუ მაყურებლისთვის კარგად ცნობილი დეიდა ლიდიაა.

წიგნის გამოსვლასთან დაკავშირებით მაღაზიებთან დაუსრულებელი რიგების შემხედვარე ხშირად ამასაც კი კითხულობენ: "რა ხდება, ნუთუ ჰარი პოტერის ახალი ნაწილი გამოვიდა?" ეს მოსაზრება არც ძალიანაა აცდენილი რეალობას, რადგან პირველივე კვირაში მარგარეტ ეტვუდის ახალი რომანის 103 177 ეგზემპლარი გაიყიდა. ეს შედეგი ერთ-ერთი საუკეთესო მაჩვენებელია და პირველი კვირის გაყიდვებით მას მხოლოდ ისეთი წიგნები სჯობნის, როგორიცაა ჰარპერ ლის მიდი დააყენე დარაჯი (168 455), დენ ბრაუნის დაკარგული სიმბოლო (551 000) და ჯოან როულინგის ჰარი პოტერი და სიკვდილის საჩუქრები (ორ მილიონზე მეტი ეგზემპლარი).

მკითხველების რიგი წიგნის მაღაზიასთან ლონდონში

ფოტო: Dylan Martinez / Reuters

ბესტსელერობასთან ერთად წიგნმა მრავალი ლიტერატურული კრიტიკოსის დადებითი შეფასება დაიმსახურა, მეტიც, ის უკვე ერთ-ერთი ყველაზე მნიშვნელოვანი ლიტერატურული პრემიის, 2019 წლის ბუკერის პრემიის ფინალისტთა სიაშიც მოხვდა, რომლის გამარჯვებულის ვინაობასაც 14 ოქტომბერს გავიგებთ.

ამ ყველაფრის გათვალისწინებით, როგორც ჩანს, სამყაროს ახალი ფემინისტური ბიბლია მოევლინა (Testament - აღთქმა, სახარება), ჩვენ კი ისღა დაგვრჩენია ქართულ თარგმანს დაველოდოთ.