მარგარეტ ეტვუდის ახალი წიგნი The Testaments მისი გახმაურებული რომანის, მხევლის წიგნის სიქველია, რომელსაც მკითხველი დიდხანს ელოდა. ახალი წიგნი ყველაზე პრესტიჟული ბრიტანული ლიტერატურული ჯილდოს — ბუკერის პრემიის წლევანდელ ლონგლისტში მოხვდა.

The Testaments-ში მოვლენები მხევლის წიგნის ამბიდან 15 წლის შემდეგ ვითარდება და სამი ქალის ამბავს მოგვითხრობს, რომლებიც ეტვუდის მიერ შექმნილ დისტოპიურ სახელმწიფოში ცხოვრობენ. ახალი რომანის მანუსკრიპტი 15 წლის განმავლობაში ჩაკეტილ ადგილას ინახებოდა.

მარგარეტ ეტვუდს, რომელმაც 2000 წელს ბუკერის პრემია უკვე მოიპოვა (რომანით ბრმა მკვლელი), წელს სერიოზული კონკურენტები ჰყავს. სხვა ნომინირებულ ავტორებს შორისაა ცნობილი ბრიტანელი მწერალი სალმან რუშდი, რომანით Quichotte, ეს ალუზიაა სერვანტესის დონ კიხოტზე. რუშდის წიგნის სიუჟეტის მიხედვით, ასაკოვან მოგზაურ კომვოიაჟერს ტელევიზიის ვარსკვლავი შეუყვარდება და მას ამერიკის გარშემო დაეძებს, რომ ხელი თხოვოს.

ნომინანტებს შორის ასევე გახლავთ ცნობილი თურქი მწერალი ელიფ შაფაქი, რომლის ახალი რომანი სტამბულელი სექს-მუშაკის შესახებ მოგვითხრობს.

ბუკერის პრემია

ბუკერის პრემია ინგლისურენოვანი ლიტერატურის ერთ-ერთი ყველაზე პრესტიჟული ჯილდოა. პრემიას თან ახლავს ფულადი ჯილდო $62,000 (2002 წლამდე ის 21 ათასი ფუნტ სტერლინგს შეადგენდა). პირველი პრემია 1969 წელს გაიცა.

პუკერის პრემიის ოთხი მფლობელი — უილიამ გოლდინგი, ნადინ გორდიმერი, ვ. ნაიპოლი და ჯონ მაქსველ კუტზეე შემდგომ ლიტერატურის დარგში ნობელის პრემიის ლაურეატები გახდნენ. 1999 წელს კუტზეე პირველი მწერალი გახდა, რომელმაც ბუკერის პრემია ორჯერ მოიპოვა. ორ წელიწადში ეს მიღწევა გაიმეორა ავსტრალიელმა მწერალმა პიტერ კერიმ.

წლევანდელი 13 ავტორიანი ლონგლისტი ექვსამდე შემცირდება და 3 სექტემბერს შორტლისტის სახით გამოქვეყნდება. გამარჯვებული კი 14 ოქტომბერს, ლონდონში გამოვლინდება.