"ვოლსკი ისეთი მხდალი კაცია, რომელსაც შეუძლია, ზურგს უკან ბიძინა ივანიშვილი ლანძღოს, მათ შორის ჩემთანაც, და პირში ელაქუცოს", — ასე გამოეხმაურა დეპუტატი ეკა ბესელია საპარლამენტო უმრავლესობის ლიდერის, გია ვოლსკის განცხადებას, რომელმაც ბესელიას ბრალდებას სისულელე უწოდა.

ბესელიას განცხადებით, ვოლსკის პირადი ბიზნესინტერესები აქვს და სწორედ ამ "პირში ლაქუცობით" მოაღწია აქამდე.

ბესელიამ დღეს, 24 სექტემბერს განაცხადა, რომ უმრავლესობის წევრებს პირადი ცხოვრების ამსახველი კადრებით აშანტაჟებენ. მისი თქმით, მოქმედი ხელისუფლება იგივე მეთოდებს იყენებს, რასაც წინა ხელისუფლება. მისივე თქმით, მსგავსი სისტემა არ უნდა შენარჩუნდეს და მთავრობა უნდა შეიცვალოს.

"შემაძრწუნებელია, როცა ადამიანი ასეთ ნაბიჯზე მიდის და ასეთ განცხადებებს აკეთებს. ალბათ, პოლიტიკურ ველზე თავის დასამკვიდრებლად [აკეთებს ამას]" — აღნიშნა ვოლსკიმ.