ქართული ოცნების დეპუტატის, ვიქტორ ჯაფარიძის მიერ #სირცხვილიას აქტივისტისთვის დარტყმის საქმეს შინაგან საქმეთა სამინისტრო შეისწავლის. ამის შესახებ On.ge-ს უწყებაში უთხრეს.

დღეს, 3 სექტემბერს ჯაფარიძემ პარლამენტის წინ შეკრებილი აქცია #სირცხვილიას მონაწილებიდან ერთ-ერთს ხელი დაარტყა და საყვირი დაუმტვრია. ამის შესახებ ინფორმაცია აქციის მონაწილეებმა გაავრცელეს. დეპუტატი პარლამენტიდან გამოდიოდა, როდესაც მას სამოქალაქო აქტივისტები სტვენით გაეკიდნენ. ამ დროს ვიქტორ ჯაფარიძემ ერთ-ერთ აქტივისტს, სოლომონ ბაჯელიძეს ხელი დაარტყა. ბაჯელიძე, ასევე, ამბობს რომ დეპუტატმა დედა შეაგინა და დაემუქრა.

პარლამენტის შესასვლელთან აქცია #სირცხვილიას მონაწილეები არიან შეკრებილნი. დღის განმავლობაში ისინი პარლამენტის შენობაში შესვლასაც ცდილობდნენ, თუმცა დაცვამ უფლება არ მისცა. მოგვიანებით პარლამენტის შესასვლელთან პოლიციამ კორდონიც გააკეთა. აქციის მონაწილეები შინაგან საქმეთა ყოფილი მინისტრის, გიორგი გახარიას პრემიერის თანამდებობაზე წარდგენას აპროტესტებენ. სწორედ მისი მინისტრობის დროს, 20 ივნისს ღამეს დაშალეს აქცია ძალის გადამეტებით. აქციის მონაწილეები მინისტრის გადადგომას 76-ე დღეა ითხოვენ.