ქალაქში, სადაც ცხოვრობ, მარტო არ ხარ. შეიძლება, ვერც ამჩნევდე, მაგრამ ამ ქალაქში შენთან ერთად გარეული ცხოველები და ფრინველები ცხოვრობენ. ქალაქი იზრდება, იცვლება და ჩვენი მეზობლების საარსებო გარემოც დღითიდღე მცირდება, თუმცა ისინი, მაინც, ჩვენ ირგვლივ არიან. სხვა მეზობლები არის ამბავი იმაზე, თუ როგორ ცხოვრობენ მელა, კვერნა, წავი, არწივი და სხვები თანამედროვე დედაქალაქის ბეტონის ჯუნგლებში.

სხვა მეზობლები მაყურებელს საშუალებას აძლევს 32 წუთით მოსწყდეს თავის ყოველდღიურობას და მის ირგვლივ არსებული სხვა სიცოცხლე დაინახოს. ამ დოკუმენტურ ფილმში არ არის დიალოგები. თბილისსა და მის შემოგარენში გადაღებული ყოველი კადრი თავად ამბობს სათქმელს.

სხვა მეზობლები კომპანია EcoFilms-ის გუნდმა გერმანიის საერთაშორისო თანამშრომლობის საზოგადოების (GIZ) მხარდაჭერით გადაიღო. ფილმის რეჟისორი და პროდუსერი ნიკა წიკლაურია. ფილმი არაკომერციულია და მისი მიზანი საზოგადოებაში გარემოს დაცვისა და ეკოლოგიის საკითხებზე ცნობიერების ამაღლებაა. პრემიერა 2019 წლის შემოდგომაზე შედგება. საფესტივალო ცხოვრების დასრულების შემდეგ, კი, იგი ინტერნეტში განთავსდება და მისი ნახვა ნებისმიერ მსურველს შეეძლება.

კომპანია EcoFilms დოკუმენტურ ფილმებს 2012 წლიდან იღებს. ამ ფილმების მთავარი ფოკუსი ყოველთვის ადამიანისა და ბუნების თანაარსებობაა. კომპანიის ბოლო ნამუშევარმა, მაღალმთიან აჭარაში გადაღებულმა ჯარამ, რომელიც ქართული ტრადიციული სკის შესახებ მოგვითხრობს, ადგილობრივ თუ საერთაშორისო ფესტივალებზე არაერთი გამარჯვება მოიპოვა.