მარგარეტ ეტვუდის ახალი წიგნი The Testaments მისი გახმაურებული რომანის, მხევლის წიგნის სიქველია, რომელსაც მკითხველი დიდხანს ელოდა. ახალი წიგნი ყველაზე პრესტიჟული ბრიტანული ლიტერატურული ჯილდოს — ბუკერის პრემიის წლევანდელ შორტლისტში მოხვდა.

The Testaments-ში მოვლენები მხევლის წიგნის ამბიდან 15 წლის შემდეგ ვითარდება და სამი ქალის ამბავს მოგვითხრობს, რომლებიც ეტვუდის მიერ შექმნილ დისტოპიურ სახელმწიფოში ცხოვრობენ. ახალი რომანის მანუსკრიპტი 15 წლის განმავლობაში ჩაკეტილ ადგილას ინახებოდა.

მარგარეტ ეტვუდს, რომელმაც 2000 წელს ბუკერის პრემია უკვე მოიპოვა (რომანით ბრმა მკვლელი), წელს სერიოზული კონკურენტები ჰყავს. სხვა ნომინირებულ ავტორებს შორისაა ცნობილი ბრიტანელი მწერალი სალმან რუშდი, ახალი რომანით Quichotte, ეს ალუზიაა სერვანტესის დონ კიხოტზე. რუშდის წიგნის სიუჟეტის მიხედვით, ასაკოვან მოგზაურ კომვოიაჟერს ტელევიზიის ვარსკვლავი შეუყვარდება და მას ხელის სათხოვნელად ამერიკის გარშემო დაეძებს.

ნომინანტებს შორის ასევე გახლავთ ცნობილი თურქი მწერალი ელიფ შაფაქი, რომლის ახალი რომანი სტამბულელი სექს-მუშაკის შესახებ მოგვითხრობს.

შორტლისტში შემავალი წიგნები

ფოტო: The Booker Prizes

ბუკერის პრემია

ბუკერის პრემია ინგლისურენოვანი ლიტერატურის ერთ-ერთი ყველაზე პრესტიჟული ჯილდოა. პრემიას თან ახლავს ფულადი ჯილდო $62,000 (2002 წლამდე ის 21 ათასი ფუნტ სტერლინგს შეადგენდა). პირველი პრემია 1969 წელს გაიცა.

პუკერის პრემიის ოთხი მფლობელი — უილიამ გოლდინგი, ნადინ გორდიმერი, ვ. ნაიპოლი და ჯონ მაქსველ კუტზეე შემდგომ ლიტერატურის დარგში ნობელის პრემიის ლაურეატები გახდნენ. 1999 წელს კუტზეე პირველი მწერალი გახდა, რომელმაც ბუკერის პრემია ორჯერ მოიპოვა. ორ წელიწადში ეს მიღწევა გაიმეორა ავსტრალიელმა მწერალმა პიტერ კერიმ.

გამარჯვებული ავტორი და წიგნი 14 ოქტომბერს, ლონდონში გამოვლინდება.