საპარლამენტო უმრავლესობის ლიდერი გია ვოლსკი ამტკიცებს, რომ გიორგი გახარიას პრემიერობის კანდიდატად წარდგენა საუკეთესო გადაწყვეტილებაა, რაც ხელისუფლება მიიღო. ამის შესახებ მან საქართველოს პარლამენტის პლენარულ სხდომაზე განაცხადა.

"ვფიქრობ, სწორი გადაწყვეტილებაა და ამაში კოლეგებიც დაგვეთანხმნენ. დღეს ოფიციალურადაც გვქონდა ამის თაობაზე გადაწყვეტილება მიღებული უმრავლესობის სხდომის ფორმატში, საუკეთესო გადაწყვეტილებაა ის, რაც მიიღო უმრავლესობამ – წარადგინოს პრემიერ-მინისტრობის კანდიდატად გიორგი გახარია", — განაცხადა გია ვოლსკიმ.

მინისტრი, რომლის გადადგომასაც საზოგადოების ნაწილი 76 დღეა ითხოვს, მმართველმა პარტიამ დააწინაურა და პრემიერ-მინისტრობის კანდიდატად წარადგინა. რამდენიმე თვის წინ შინაგან საქმეთა მინისტრი გახარია ამტკიცებდა, რომ პრემიერობა არ სურს. ასევე, ამბობდა, რომ 20 ივნისის საქმის გამოძიებას ბოლომდე მიიყვანდა, ამიტომ გადადგომას არ აპირებდა, თუმცა დღეიდან შინაგან საქმეთა მინისტრი აღარ არის.