საქართველოს პრეზიდენტი, სალომე ზურაბიშვილი პოლონეთის დედაქალაქ ვარშავაში უკრაინის პრეზიდენტ ვოლოდიმირ ზელენსკის შეხვდა. ინფორმაციას პრეზიდენტის პრესსამსახური ავრცელებს.

მათი ცნობით, პრეზიდენტებს შორის ორმხრივი შეხვედრა გაიმართა, სადაც მხარეებმა ორი ქვეყნის ურთიერთობის გაძლიერებაზე და ერთობლივ მიზნებზე ისაუბრეს. მათივე ინფორმაციით, შეხვედრის დროს ვოლოდიმირ ზელენსკიმ საქართველოს პრეზიდენტი უკრაინაში მიიპატიჟა.

"შეხვედრაზე აღინიშნა, რომ საქართველოსა და უკრაინას მსგავსი გამოწვევები და მიზნები აქვთ და ორმა ქვეყანამ მათი გადაჭრის გზები ერთად უნდა ეძებოს. საუბარი, ასევე, შეეხო ევროკავშირთან დაახლოებას და გლობალურ საფრთხეებს", — აღნიშნულია პრეზიდენტის პრესსამსახურის მიერ გავრცელებულ ინფორმაციაში.

სალომე ზურაბიშვილი პოლონეთში სამუშაო ვიზიტით იმყოფება.