ხულოს მუნიციპალიტეტის სოფელ ღურტას საბავშვო ბაღის გამგე, მედეა მამულაძე TV25-ის ჟურნალისტს "თავზე მიკროფონის დახურვით" დაემუქრა. გარდა ამისა, საბავშვო ბაღის გამგე ჟურნალისტ სულხან მესხიძეს სხვადასხვა თანამდებობის პირის "შეწუხებით" დაემუქრა. მისივე თქმით, მას უშიშროებიდანაც არ აკლია მხარდაჭერა.

TV25-ის ჟურნალისტის თქმით, მედეა მამულაძე საბავშვო ბაღის ოფიციალურ ფეისბუქგვერდზე თანამშრომლების მიმართ შეურაცხმყოფელ და მუქარის შემცველ პოსტებს აქვეყნებდა. ამ დროისთვის არც ერთი პოსტი აღარ იძებნება. გარდა ამისა, არხმა გაავრცელა ვიდეოჩანაწერები, სადაც ბაღის ხელმძღვანელისა და თანამშრომლების დაპირისპირება ჩანს.

სატელეფონო საუბარში მედეა მამულაძემ TV25-ს დაუდასტურა, რომ ფეისბუქზე პოსტებს თვითონ წერს და თანამშრომლებთან კონფლიქტი ნამდვილად აქვს. მისივე თქმით, თანამშრომლები ბაღიდან მის გაგდებას ცდილობენ. თუმცა შემდგომში მან ჟურნალისტს უთხრა, რომ ის "ინტრიგნულს ედევნება" და "ყველაფრის აწრიალებითა" და "თავზე დახურვით" დაემუქრა:

"მთელი რაიონი ავაწრიალე და ბაუჩაძეს სასამართლო მოვუგე, "კაროლივით" ვზივარ ბაღის ხელმძღვანელად. ავაწრიალებ ყველაფერს, დაგახურავ თავზე. არც ვახტანგ ბერიძიდან [აჭარის პოლიციის დეპარტამენტის ხელმძღვანელის მოადგილე] მაკლია მხარდაჭერა, არც ანზორ ბოლქვაძისგან [ხულოს მაჟორიტარი დეპუტატი] და არც ბაღების დირექტორისგან და არც უშიშროებისგან. დაგახურავთ ყველაფერს თავზე. რაც ამოსაქექი იყო ბაუჩაძის დროს, ამოგექექათ და გაგეშუქებინათ მართლა. ცოტა ნორმალურად იაზროვნე, მე გეუბნები შენ. გაფრთხილებთ, ანზორ ბოლქვაძეს კიდევ შევაწუხებ, ვახო ბერიძეს კიდევ შევაწუხებ. აჭარის მთავრობამდე მისვლამდე, თორნიკე რიჟვაძესთანაც [აჭარის მთავრობის ხელმძღვანელი] შესასვლელი ვარ, მთელი ცხოვრება მაქვს მოსაწყობი და კიდევ შევაწუხებ, მაგ 25-ე არხის მიკროფონს დაგახურავ თავზე", — უთხრა მედეა მუმლაძემ ჟურნალისტს.

სიუჟეტის ანონსის ფეისბუქზე გამოქვეყნების შემდეგ მედეა მამულაძე სულხან მესხიძეს ანონსის აღება მოსთხოვა, წინააღმდეგ შემთხვევაში თვიტმკვლელობით დაემუქრა. აღნიშნულ საქმეს შინაგან საქმეთა სამინისტრომ სისხლის სამართლის კოდექსის 115-ე მუხლით იძიებს, რაც თვითმკვლელობამდე მიყვანს გულისხმობს.