ზაზა ფაჩულიამ საკალათბურთო კარიერა დაასრულა და Golden State Warriors-ში ბრუნდება. კლუბის განცხადებით, კალათბურთელი მათი კონსულტანტი იქნება. ESPN-ის ინფორმაციით, ფაჩულია კლუბს კონსულტაციას, როგორც კალათბურთის სფეროში, ასევე, ბიზნესისა და რეკლამის მიმართულებით გაუწევს.

გამოცემა WARRIORSWIRE წერს, რომ Golden State-ის მებრძოლებს ფაჩულია სამუდამოდ დაამახსოვრდებათ სიმპატიურ დიდ კაცად, რომელიც დაეხმარა სამი ჩემპიონატიდან ორის მოგებაში.

"ახლა როგორც ჩანს, მებრძოლები აჯილდოებენ მას წვლილისთვის და აბრუნებენ კლუბში ახალი როლით", — წერია სტატიაში.

ფაჩულიას კარიერა

1999-2003 წლებში ზაზა ფაჩულია სტამბულის ულქერის ღირსებას იცავდა. მას მიღებული აქვს თურქეთის ჩემპიონის ტიტული, არის თურქეთის თასის მფლობელი და სამგზის თურქეთის პრეზიდენტის თასის მფლობელი.

ფაჩულიამ ეროვნულ ნაკრებში თამაში 2000 წლიდან დაიწყო. მისი კაპიტნობით ეროვნულმა ნაკრებმა ზედიზედ ოთხ ევროპის ჩემპიონატზე ითამაშა — 2011 წელს ლიტვაში, 2013 წელს სლოვენიაში, 2015 წელს ხორვატიაში და 2017 წელს ისრაელში.

ფაჩულიამ NBA-ში 16 წელი გაატარა და 1098 მატჩი ჩაატარა. Golden State Warriors-ის შემადგენლობაში მან ორჯერ მოირგო ჩემპიონის ბეჭედი. სხვადასხვა დროს ის დეტროიტის, ორლანდოს, მილუოკის, ატლანტას და დალასის კლუბებში თამაშობდა.

2017 წელს ზაზა ფაჩულია საქართველოს პრეზიდენტმა გიორგი მარგველაშვილმა ღირსების ორდენით დააჯილდოვა.