გამომძიებელ ჟურნალისტთა გაერთიანების, აი, ფაქტის ინფორმაციით, ყაზბეგი-ფასანაურის გზის პირას მდებარე ობიექტები რუსულ რუბლში ვაჭრობენ. გამოცემამ ექსპერიმენტი ორ სასტუმროში, სამ კაფეში და გარემოვაჭრეებთან ჩაატარა და დაადგინა, რომ ყველა მათგანი მომსახურების საფასურს რუბლში იღებს. მათივე ცნობით, ტურისტებმაც დაუდასტურეს რომ ისინი მომსახურებაში რუბლს იხდიან.

საქართველოს ეროვნული ბანკის კანონის თანახმად, ლარი არის გადახდის ერთადერთი კანონიერი საშუალება საქართველოს ტერიტორიაზე, გარდა თავისუფალი ინდუსტრიული ზონებისა, თავისუფალი ვაჭრობის პუნქტებისა ან/და ეროვნული ბანკის მიერ განსაზღვრული შემთხვევებისა. დარღვევის შემთხვევაში ფიზიკური პირი ჯარიმდება 200 ლარით, იურიდიული პირი კი 400 ლარით.

აი, ფაქტის მიმართვის შემდეგ ინფორმაცია პასუხისმგებელ უწყებას, შემოსავლების სამსახურის მონიტორინგის სამსახურს გადასცეს. გამოცემა წერს, რომ სხვა კითხვებზე მათ არ უპასუხეს.