საქართველოს ექსპრეზიდენტის მიხეილ სააკაშვილის განცხადებით, აგვისტოს ომის დროს ხელისუფლებამ შეცდომები დაუშვა. ერთ-ერთი შეცდომა იყოს ის, რომ მზად არ იყვნენ. ამის შესახებ საქართველოს ყოფილმა პრეზიდენტმა, მიხეილ სააკაშვილმა ომისა და მშვიდობის გაშუქების ინსტიტუტისთვის (IWPR) მიცემულ ინტერვიუში განაცხადა.

მისი განცხადებით, რუსეთის სცენარი იყოს ნათელი. ეს იყო გამოხატული და არა სპეკულაციური, თუმცა არ არსებობდა არანაირი სცენარი, რომელიც საქართველოსთვის კარგი იქნებოდა.

კითხვაზე, არსებობდა თუ არა გზა, გარდა ბრძოლისა, მიხეილ სააკაშვილი პასუხობს: "ჩემი გადმოსახედიდან, თუ არ იბრძვი, უნდა ეცადო მაინც. და ჩვენ დავუშვით შეცდომები. ერთ-ერთი შეცდომა იყო ის, რომ ჩვენ მზად არ ვიყავით. ჩვენი შიში გახდა ქრონიკული და ჩვენ არ ვიყავით მზად იმისთვის რაც მოხდა. ძალიან დაძაბულები ვიყავით".

ჟურნალისტის კითხვაზე, იყო თუ არა ეს პარანოია, მიხეილ სააკაშვილი პასუხობს, რომ არა: "მოგვიანებით, გარკვეულ მომენტში, ჩვენ ვეუბნებოდით ჩვენს თავს, რომ ეს ნორმალურია. გაზაფხულზე ჩვენ ვიყავით ძალიან ახლოს ომთან. ამის შემდეგ იყო უამრავი შუამავლობა და გარკვეულ მომენტში, ჩვენ მივეცით ჩვენს თავს უფლება იმაზე ფიქრის, რომ ნორმალურია. თქვენ იცით, ეს პატარა ქვეყანაა. ხალხი უნდა წავიდეთ დასასვენებლად, ოფიცრებსაც სჭირდებათ დასვენება, მთავრობამაც უნდა დაისვენოს სადღაც. მე 7 აგვისტოს ძალიან ახლოს ვიყავი გაფრენასთან. მე მივედი აეროპორტში ორჯერ და ორჯერვე უკან დავბრუნდი. ჩვენ მივდიოდით ბეიჯინგში ოლიმპიადაზე. დაძაბულობა ქრონიკული გახდა, იქ იყო სროლა, შეწყვეტა, სროლა, ისევ შეწყვეტა და ასე გრძელდებოდა, ამიტომ ვიფიქრეთ, რომ ეს ნორმალურია, ახალი არაფერია ამაში. ჯობდა წავსულიყავი ბეიჯინგში და ლიდერები მენახა. ჯობდა წავსულიყავი და შემეჩივლა მათთვის".

სააკაშვილის თქმით, 7 აგვისტოს საღამოს დაიწყო მასობრივი სროლა შეტევა და ამიტომ ის დარჩა. მისი განმარტებით, მანამდე გეგმა იყო ის, რომ წასულიყო ბეიჯინგში ენახა ლიდერები "ბუში ან ვინმე სხვა" და ეთქვა "ასეთი სიტუაცია გვაქვს, გთხოვთ, ჩაერიეთ".

"მე ვცდილობდი ყველასთან დარეკვას, თუმცა ისინი არ პასუხობდნენ, მხოლოდ ნატოს გენერალურმა მდივანმა იაპ დე ჰოოპ სხეფერიმ მიპასუხა, თუმცა ხაზზე დიდი ხანი არ დარჩა. ვცადე დამერეკა ბოლტერ შტაინმეიერისთვის, შემდგომში გერმანიის საგარეო საქმეთა მინისტრისთვის, ის არდადეგებზე იყო. ვცადე დამერეკა ვინმესთვის ვაშინგტონში და არავი იყო. მაიკლ კარპენტერი იყო ერთადერთი, რომელიც იყო სახელმწიფო დეპარტამენტში. შემდეგ მოვახერხე საუბარი შვედეთის საგარეო საქმეთა მინისტრთან, ჩარლ ბილდტთან", — ამბობს მიხეილ სააკაშვილი.

2008 წლის აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე.

2008 წლის ომის დაწყებიდან 11 წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს, იტაცებს ხალხს და მცოცავი ოკუპაციის პირობებში აცხოვრებს საქართველოს. ახლანდელი ხელისუფლება კი აგვისტოს ომის დაწყებაში ნაციონალური მოძრაობის ხელისუფლებას ადანაშაულებს, მათ ლიდერს, მიხეილ სააკაშვილს კი "პროცესების თანამონაწილეს" უწოდებს.