დაახლოებით ერთი თვის წინ, Nokia-ს წარმომადგენლებმა მსოფლიოს სამი გიგანტის ძალიან მნიშვნელოვანი პარტნიორობის შესახებ დააანონსეს, რაც Nokia-ს ისტორიაში ფაქტობრივად ახალი ეტაპის დასაწყისს ნიშნავს. საუბარია ტელეფონებისა და პლანშეტების მიმართულებით Nokia-ს ბრენდის ექსკლუზიური ლიცენზიანტის — HMD Global-ის პარტნიორობაზე უმსხვილეს დამოუკიდებელ IT და ბიზნეს-საკონსულტაციო კომპანია CGI-სა და Google Cloud-თან. მსოფლიოს უმსხვილესი ტრენდ-სეტერების კოლაბორაცია მიზნად ისახავს, Nokia-ს მომხმარებლებს პერსონალური ინფორმაციის დაცვის ახალი სტანდარტები შესთავაზოს, იმ ფონზე, როდესაც ჰაკერული შეტევების უამრავ შემთხვევას ვაწყდებით. როგორც ალიანსის მხარეები აცხადებენ, Google Cloud-ის მოწინავე მონაცემთა ანალიტიკის და ტექნოლოგიების CGI-ს ექსპერტიზასთან შერწყმით Nokia-ს მთელი მსოფლიოს მასშტაბით სრულიად ახალ გამოცდილებებს გაიზიარებენ.

ცნობილია, რომ HMD Global-ის, CGI-სა და Google Cloud-ის კოლაბორაცია მობილური უსაფრთხოების გაძლიერების მიზნით ახალ, ევროპულ დატაცენტრს გამოიყენებს: მობილური აქტივაციისა და სხვა მონაცემების დაცვის მიზნით ფინეთში ახალი Google Cloud-ი — Google-ის ახალი ღრუბლოვანი ინფრასტრუქტურა შეიქმნა, რაც Nokia-ს მომხმარებლებს სმარტფონების მუშაობის მაღალ სისწრაფეს და ზოგადად მოწყობილობის გაუმჯობესებას ჰპირდება; ახალი მოდელების — 4.2-ის, 3.2-ისა და 2.2-ის მფლობელებს კი შეძენიდან 36 თვის განმავლობაში სისტემური და უსაფრთხოების მუდმივი განახლებებით გაანებივრებს.

HMD Global-ის CGI-სა და Google Cloud-თან თანამშრომლობის ფაქტს საქართველოში Nokia-ს ოფიციალური წარმომადგენელი "სავაჭრო სახლი გოლეთიანიც" ადასტურებს და აცხადებს, რომ სამივე სახეობის "მომავლის" სმარტფონი საქართველოშიც გაყიდვაშია.

"ახალი არ იქნება თუ აღვნიშნავთ, რომ ბოლო ათწლეულის განმავლობაში მობილური ტელეფონების ფუნქცია მნიშვნელოვნად შეიცვალა — სმარტფონები ზარის განხორციელებისა თუ ინტერნეტში ძვრომიალის შესაძლებლობის საზღვრებს დიდი ხანია გაცდნენ და ჩვენს პერსონალურ ასისტენტებად იქცნენ, თანაც საკმაოდ ნდობით აღჭურვილ ასისტენტებად — თუ გავითვალისწინებთ ფაქტს, რომ ისინი ჩვენ შესახებ უამრავ საბანკო და პერსონალურ ინფორმაციას ფლობენ. ამ მოცემულობამ კი მომხმარებლის პროდუქტისადმი დამოკიდებულებასა და სურვილებზეც მნიშვნელოვანი გავლენა მოახდინა და პირდაპირი მნიშვნელობით, მათი ქცევა შეცვალა: თუ ადრე მობლიურ ტელეფონებს დიზაინის ან ტრენდულობის მიხედვით ვარჩევდით, დღეს წინა პლანზე უსაფრთხოება დგას — სრულად დაცული სისტემა, რომელიც მუდმივად განახლებადია!

აქვე აღვნიშნავ დროის ფაქტორსაც — ადამიანების ცხოვრების რიტმი უფრო და უფრო სწრაფი ხდება და ჩვენი მოთხოვნაც, სასურველი ინფორმაცია რაც შეიძლება მოკლე ვადაში მივიღოთ, ყოველდღიურად ძლიერდება. Nokia-ს ახალი მოდელების — 4.2-ის, 3.2-ისა და 2.2-ის შემთხვევაში ეს მისია Google Assistant-ის მარტივმა ღილაკმა იტვირთა, რაც სასურველი ინფორმაციის მოძიების თუ სხვა მობილური ოპერაციის შესრულებას წამებში ხდის შესაძლებელს.

საბოლოო ჯამში, სიახლე, რომელიც 2019 წლის 18 ივნისს HMD Global-მა გაგვაცნო, უსაფრთხოების, კონტროლისა და ანალიტიკის სრულიად ახალი საფეხურს გულისხმობს და Nokia-ს მომხმარებლებს გვახსენებს, რომ სანდო ხელში ვართ: Google-ს ჩემი წარდგენა არ სჭირდება, CGI კი მსოფლიოში უმსხვილესი დამოუკიდებელი IT და ბიზნეს-საკონსულტაციო კომპანიაა, რომელიც 1976 წლიდან ოპერირებს, მისი ყოველწლიური შემოსავალი დაახლოებით 11,5 მილიარდი აშშ დოლარია და სხვადასხვა ქვეყანაში 77000 კონსულტანტსა თუ პროფესიონალს აერთიანებს", - ამბობს მარიამ გამცემლიძე, "სავაჭრო სახლ გოლეთიანის" ინტეგრირებული მარკეტინგული კომუნიკაციების ხელმძღვანელი.

Nokia-ს წარმომადგენლების განცხადებით, ახალ დატაცენტრში საწყის ეტაპზე სამი მოდელის — 4.2-ის, 3.2-ისა და 2.2-ის მონაცემები განთავსდება, ხოლო უფრო ადრინდელი მოდელების მონაცემების მიგრაცია ახალ ღრუბლოვან ინფრასტრუქტირაზე ანდროიდ Q-ს განახლების შემდეგ, ამა წლის ბოლოს დაიწყება და 2020 წელს დასრულდება.

HMD Global-ის პროდუქტის მთავარი მენეჯერი იუჰო სარვიკასი აცხადებს: "ბრენდის ფინური მემკვიდრეობის ერთგულები ვრჩებით და ინვესტიციას სწორედ ჩვენს ევროპულ სახლში ვზრდით. ახალი ღრუბლოვანი ინფრასტრუქტურის შესაქმნელად CGI-სა და Google Cloud-თან პარტნიორობა წარსული წარმატებული კოლაბორაციების შედეგად გადაწყდა და მიზნად ისახავს, Nokia-ს მომხმარებელთა მონაცემები ევროკავშირის მიერ დადგენილი უსაფრთხოებისა და კონფიდენციალურობის შესახებ არსებული კანონმდებლობის (General Data Protection Regulation) ყველა წესის გათვალისწინებით დაიცვას. შედეგად, Nokia-ს ნებისმიერი სმარტფონი ანდროიდ One-ის სისტემით 3 წლის განმავლობაში რეგულარულ უსაფრთხოების განახლებებს მიიღებს, 2 წლის განმავლობაში კი OS-ის განახლებებს."

Google-ის წარმომადგენლები ახალი თანამშრომლობის შედეგად მიღწეული წარმატების მთავარ ღირებულებად გარემოსდამზოგავ ასპექტებს ასახელებენ: "Google-ი ყოველწლიურად მთელ მსოფლიოში 100%-ით განახლებად ელექტროენერგიას მოიხმარს, რაც კიდევ უფრო აღრმავებს HMD Global-თან ჩვენს კოლაბორაციას და მომხმარებლებს სრულად გარემოსდამზოგავ გადაწყვეტილებას სთავაზობს. CGI-ს ინჟინერებმა და მეცნიერებმა back-end-მონაცემების და სმარტფონების დასაკავშირებლად მსოფლიო კლასის ინფრასტრუქტურა შექმნეს, რაც HMD Global-ს საშუალებას აძლევს, მონაცემთა დაცვა კიდევ უფრო გააძლიეროს და მომხმარებლების კმაყოფილება აამაღლოს," — განაცხადა Google Cloud-ის ჩრდილოეთ ევროპის განყოფილების მმართველმა დირექტორმა ევა ფორსმა.