საქართველოს ახალგაზრდა იურისტთა ასოციაცია საზოგადოებრივ მაუწყებელზე კომერციული რეკლამების განთავსების უფლებას ასაჩივრებს. ორგანიზაციამ საკონსტიტუციო სასამართლოში სარჩელი დღეს, პირველ აგვისტოს შეიტანა.

"საზოგადოებრივი მაუწყებლის ეთერში საინფორმაციო და საზოგადოებრივ-პოლიტიკურ პროგრამებში რეკლამის განთავსების შესაძლებლობა, ქმნის საზოგადოებრივ მაუწყებელზე არსებითი კომერციული გავლენის დამყარების საფრთხეს, რამაც შესაძლოა გავლენა მოახდინოს ამ ბიზნესის საქმიანობის ამსახველი რეპორტაჟების ობიექტურობასა და მიუკერძოებლობაზე", — წერია განცხადებაში.

ახალგაზრდა იურისტთა ასოციაცია წერს, რომ ორგანიზაცია არ ასაჩივრებს არასაუკეთესო დროს (24 საათიდან 19 საათამდე) გასართობ გადაცემებში, ფილმებსა და სერიალებში, სპორტული რეპორტაჟის, საერთაშორისო კონკურსის და ფესტივალის ფარგლებში რეკლამის განთავსების კონსტიტუციურობას.

სარჩელი მაუწყბლობის შესახებ კანონში შეტანილ ცვლილებებს ეხება, რომელსაც პარლამენტმა მხარი 2018 წლის 21 თებერვალს დაუჭირა. ცვლილებების მიხედვით, საზოგადოებრივ მაუწყებელს კომერციული რეკლამის დამატებით განთავსების უფლება ექნებოდა და რიგ შემთხვევაში ტენდერის გარეშე შეძლებდა მომსახურების შეძენას.