ერთ დროს, ადამიანები ამ სიტყვებს ბუნებასთან მიმართებაში იყენებდნენ, ახლა კი ისინი ძირითადად მხოლოდ ტექნოლოგიის სფეროში გამოიყენება. კვლევა ლიდსის უნივერსიტეტის მკვლევარმა, პროფესორმა რობი ლავმა ჩაატარა.

ბოლო რამდენიმე ათწლეულის განმავლობაში შეკრებილი მონაცემთა ბაზების ანალიზით, რომლებშიც არაფორმალური საუბრები იყო ჩაწერილი, აღმოჩნდა, რომ ბრიტანეთში ზოგიერთი სიტყვის განმარტება ერთი თაობის განმავლობაში პრაქტიკულად სრულად შეიცვალა.

ყველაზე დიდი ტრანსფორმაცია სიტყვა ტვიტმა განიცადა. 1990-იანებში სიტყვის ყველა ხსენება ჩიტების ჭიკჭიკს აღნიშნავდა, 2010-იან წლებში 100 ხსენებიდან ჩიტის ჭიკჭიკი მხოლოდ ერთში იგულისხმებოდა, ყველა დანარჩენი კი სოციალურ ქსელში განთავსებულ პოსტებს ეხებოდა.

რაც შეეხება სიტყვა "ქსელს," 1990-იანებში ამ სიტყვის 10-დან 7 ხსენება ობობის ქსელს ეხებოდა. ბოლო ათწლეულში კი ყოველი 10 ხსენებიდან ობობის ქსელთან კავშირში ერთიც კი არ იყო. მსგავსი მდგომარეობაა ისეთი სიტყვების შემთხვევაშიც, როგორიც არის branch (ტოტი), net (ქსელი), fibre (ბოჭკო), field (მდელო) და cloud (ღრუბელი).

"ენაში კარგად ჩანს, თუ რა არის მნიშვნელოვანი ამა თუ იმ კულტურისა და საზოგადოებისთვის. ბუნებასთან ასოცირებული სიტყვების ასეთი ტრანსფორმაცია პოტენციურად მიანიშნებს იმაზე, რომ ბუნება ახლა ნაკლებად მნიშვნელოვანია. მას სხვა რამეები, ამ შემთხვევაში კი, ტექნოლოგია ანაცვლებს", — აცხადებს ლავი.

მან კვლევისას ასევე დაადგინა, რომ ახალგაზრდებში უფრო და უფრო ნაკლებად გამოიყენება ისეთი სიტყვები, როგორებიც არის პიკნიკი, ბალახი, თოვლი, ჯუნგლები, მთა, ნიადაგი, ქვა, ჩიტი, ეზო და ნიჟარა.