ინფრასტრუქუტურის მინისტრის, მაია ცქიტიშვილის თქმით, ანაკლიის პორტის პროექტი მაინც განხორციელდება იმის მიუხედავად, ანაკლიის განვითარების კონსორციუმი მიაღწევს თუ არა წარმატებას და მოიზიდავს თუ არა თანხებს. მინისტრისვე განცხადებით, მთავრობა დაინტერესებულია, რომ პორტის პროექტი კონსორციუმმა განახორციელოს.

როგორც ცქიტიშვილმა ჟურნალისტებთან თქვა, კონსორციუმი თავის ვალდებულებებს არ ასრულებს და ვალდებულებები უკვე მეხუთედ გადაუვადეს.

"ჩვენი მხრიდან უპრეცედენტო მხარდაჭერაა, მათ შორის ამ გადავადებებში, მათ შორის სანქციების პატიებაში. სახელმწიფოს მხრიდან 250 მილიონი დოლარის საერთო ინვესტიცია იდება ამ პროექტში, როგორც გზის, ისე რკინიგზის მშენებლობის, ასევე, მიწის გამოსყიდვის ნაწილში. 100 დოლარის ინვესტიციას სახელმწიფო უშუალოდ დებს... უბრალოდ საჭიროა, რომ ნაცვლად პოლიტიკური სპეკულაციებისა, ნაცვლად ამ არაკოსნტრუქციული პროცესისა კონსორციუმმა მიხედოს იმას, რაც უნდა გააკეთოს", — განაცხადა მინისტრმა.

ანაკლიის განვითარების კონსორციუმს სამშენებლო ნებართვით გათვალისწინებული დოკუმენტების წარმოდგენის ვადა 31 დეკემბრის ჩათვლით გაუხანგრძლივდა.

ანაკლიის ღრმაწყლოვან პროექტზე მუშაობა ანაკლიის განვითარების კონსორციუმმა და სახელმწიფომ 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა, წელიწადში, 100 მლნ ტონა იქნება. პორტი ოკუპირებული ტერიტორიებიდან რამდენიმე ათეული კილომეტრითაა დაშორებული.