24 წლის რუსი მოდელი და ინსტაგრამის ინფლუენსერი ეკატერინა კარაგლანოვა საკუთარ სახლში მოკლეს. ის ცნობილი იყო მოდასთან და მოგზაურობასთან დაკავშირებული პოსტებით და ინსტაგრამზე 90 ათასზე მეტი გამომწერი ჰყავდა.

მას გამომწერები ხშირად ამსგავსებდნენ ოდრი ჰეპბერნს და თავად კარაგლანოვაც ხშირად პოსტავდა მსახიობის სურათებს. ერთ-ერთ პოსტზე ის წერდა, რომ მოგზაურობა უყვარდა, თუმცა ერთ ქვეყანაში ხუთ დღეზე მეტს არ ატარებდა. ეკატერინა მოსკოვის სამედიცინო სკოლაში დერმატოლოგის პროფესიას ეუფლებოდა.

კარაგლანოვა 30 ივლისს 25 წლის ხდებოდა და დაბადების დღის აღნიშვნას შეყვარებულთან ერთად ჰოლანდიაში გეგმავდა. თუმცა, მას შემდეგ, რაც დღეების განმავლობაში მშობლების ზარებს არ უპასუხა, ოჯახის წევრებმა მის ბინაში შესვლაზე ნებართვა მოითხოვეს.

ეკატერინა საკუთარ სახლში, კისერზე ჭრილობებით გარდაცვლილი, პარასკევს იპოვეს. როგორც BBC წერს, მისი სხეული დერეფანში დატოვებულ ჩემოდანში იყო მოთავსებული.

გამოცემის ცნობით, პოლიცია მკვლელობის მოტივად ეჭვიანობას ასახელებს. ისინი ასევე აცხადებენ, რომ აქვთ ფარული ვიდეოს ჩანაწერი, რომელშიც ჩანს, რომ ეკატერინას სახლიდან მისი სავარაუდო ყოფილი შეყვარებული გამოდის.

როგორც Yahoo წერს, კარაგლანოვას მკვლელობაზე ერთი პირი უკვე დაკავებულია.