აშშ-ს პრეზიდენტმა დონალდ ტრამპმა საკუთარ თავს "ყველაზე ნაკლებად რასისტი უწოდა". ეს განცხადება მას შემდეგ გაავრცელა, რაც რასიზმში კიდევ ერთხელ დაადანაშაულეს. ტრამპმა თქვა, რომ მისი პრეზიდენტობა არის წარმატება აფრიკელი ამერიკელებისთვის.

"მე ვარ ყველაზე ნაკლებად რასისტი პრეზიდენტი, ვიდრე ვინმეა მსოფლიოში. აფრიკელი ამერიკელები მირეკავენ თეთრ სახლში. ისინი არასდროს ყოფილან ასეთი ბედნიერები იმით, რასაც პრეზიდენტი აკეთებს, ეს არის არა მხოლოდ აფრიკელი ამერიკელების უმუშევრობის ყველაზე დაბალი მაჩვენებელი, არა მხოლოდ შესაძლებლობების სივრცე, არა მხოლოდ კრიმინალის წინააღმდეგ რეფორმა. ისინი ბედნიერები არიან, რომ ბალტიმორში პოლიტიკურ კორუფციაზე გავამახვილე ყურადღება. ფაქტია, რომ აფრიკელ ამერიკელებს უყვართ ის საქმე, რასაც მე ვაკეთებ, რადგან მე მათთვის ვმუშაობ. მე არ ვმუშაობ პოლიტიკოსებისთვის", — განაცხადა ტრამპმა.

უცხოური მედიის ცნობით, დონალდ ტრამპმა მიზანში ამოიღო მერილენდის შტატის წარმომადგენელი დემოკრატიული პარტიიდან ელიაჰ კუმინგი. მან თქვა, რომ კონგრესმენმა ძალიან ცუდი სამუშაო გაუწია თავის დასახლებას და ბალტიმორს. მისივე განცხადებით, ბალტიმორში "აფრიკელი ამერიკელები ჯოჯოხეთში ცხოვრობენ".

"დემოკრატები ყოველთვის იყენებენ რასას თავისი უპირატესობისთვის, მაგრამ კუმინგმა კრახი განიცადა", — დაწერა ტრამპმა. მან მოგვიანებით ტვიტერი განაახლა და კონგრესმენის დასახლებას "ვირთხებით და მღრნელებით დაავადებული უწოდა".

კვირას ტრამპმა კუმინგი, რომელიც აფრიკელი-ამერიკელია, ყოველგვარი ახსნა-განმარტებით გარეშე რასისტად მოიხსენია და მოუწოდა მისი ენერგია ხალხის დახმარებისკენ მიმართოს.

მერილენდის კონგრესმენმა არ უპასუხა ტრამპის ახალ ტვიტს, თუმცა შაბათს განაცხადა: "მე მივდივარ სახლში, ჩემს დასახლებაში ყოველდღიურად, მე ვდგები ყოველ დილით და ვიბრძვი ჩემი მეზობლებისთვის".

დემოკრატების პრეზიდენტობის კანდიდატმა ბერნი სანდერსმა დაგმო ტრამპის განცხადებები და თქვა: "დაუჯერებელია, რომ ჩვენ გვყავს პრეზიდენტი, რომელიც ებრძვის თავის ამერიკელ მოქალაქეებს, რომელიც ურტყამს ამერიკას, ის ურტყამს იმ ადამიანებს, რომლებიც ჩვენი მეგობრები არიან".

ტრამპმა ამერიკელ აქტივისტს, ალფრედ შარფტონს პრობლემების შემქმნელი მას შემდეგ უწოდა, რაც შარფტონმა ტრამპის ბოლოდროინდელ განცხადებებზე პრესკონფერენცია დააანონსა.

ამ განცხადებებამდე ერთი თვით ადრე დემოკრატმა ნენსი პელოსიმ ამერიკის შეერთებული შტატების პრეზიდენტი დონალდ ტრამპი რასიზმში დაადანაშაულა. ტრამპის აზრით, ბალტიმორში აფრო-ამერიკელების დასახლება ყველაზე საშინელია. მანამდე კი რამდენიმე ქალ კონგრესმენზე დონალდ ტრამპმა განაცხადა, რომ თუ ამერიკა არ მოსწონთ, შეუძლიათ იმ ქვეყნებში წავიდნენ, საიდანაც აშშ-ში ჩავიდნენ.