გივი თარგამაძის მანქანის აფეთქებასთან დაკავშირებით, ენმ-ს წევრმა, ზურაბ ჭიაბერაშვილმა პარტიის ოფისში საგანგებო ბრიფინგი გამართა და განაცხადა, რომ ბიძინა ივანიშვილსა და მის "მარიონეტებს" ქვეყანაში არეულობის შექმნით ხელისუფლების შენარჩუნება სურთ.

ჭიაბერაშვილმა განმარტა, რომ საქმეს კვალიფიკაცია არა განზრახ მკვლელობის მცდელობის, არამედ ტერაქტის მუხლით უნდა მიეცეს, რადგან 90-იანი წლების შემდეგ თბილისში მსგავს ინციდენტს ვერ იხსენებს:

"ასეთი ტერაქტი შევარდნაძის 90-იან წლებს გვახსენებს. ბუნებრივად ჩნდება ეჭვი ხელისუფლებასთან მიმართებით, რომ ჩვენ ბოლო 1 წლის განმავლობაში ვნახეთ საშინელი ფაქტების კასკადი: ბუკა პეტრიაშვილზე თავდსასხმა, კორცხელის ფაქტი, ერთი კვირის წინ გორში ოქრუაშვილს საარჩევნო შეხვედრაზე ესროლეს. ყველა ამ ფაქტზე ხელისუფლების რეაქცია მიუთითებს იმაზე, რომ ბიძინა ივანიშვილს პირადად და მის მარიონეტებს, კვირიკაშვილს, კალაძეს და სხვებს აწყობთ ის ქაოსი და არეულობა, რისკენაც ისინი მიგვაქანებენ. ამ ეჭვს კვირიკაშვილის წუხანდელი რეაგირებაც აძლიერებს, გვაძლევს საფუძველს, რომ ვიეჭვოთ, რომ ხელისუფლებას აქვს თავისი ჩამოყალიბებული გეგმა იმისთვის, თუ რა უნდა მოხდეს, როგორი განწყობები უნდა შექმნან, რო ასეთი ტერაქტებით და არეულობებით შეინარჩუნონ ხელისუფლება".

მისი თქმით, მნიშვნელოვანია, რომ პოლიციელებს, რომლებიც ამ საქმეში თავისი მოვალეობების შესრულებას შეეცდებიან, მმართველმა გუნდმა ხელი არ შეუშალოს:

"ისინი მოგროვებენ მასალს, რომელიც ძალიან კვალიფიციური ექსპერტების მუშაობით ამ ტერაქტს გახსნის. თუმცა, რა არის პოლიტიკური დაკვეთა, ეს კვირიკაშვილის მინიშნებებში კარგად გამოჩნდა. შესაბამისად, სანამ ეს ხელისუფლებაა, რაიმე სიახლეს არ უნდა ველოდოთ".

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.