აშშ-ს ეროვნულ-დემოკრატიული ინსტიტუტის (NDI) საქართველოს ოფისის დირექტორმა, ლორა თორნტონმა ყოფილი თავდაცვის მინისტრის, ირაკლი ოქრუაშვილის დაკავების საქმეზე პოლიტიკური განცხადების გაკეთებისგან თავი შეიკავა, თუმცა აღნიშნა, რომ ყოფილი თავდაცვის მინისტრის საქმეს ისინი თვალს ადევნებენ.

ლორა თორნტონი სხვა არასამთავრობო ორგანიზაციების წარმომადგენლებთან ერთად ირაკლი ოქრუაშვილის თანაპარტიელების მიერ ორგანიზებულ შეხვედრაზე იმყოფებოდა.

"მივიღე მეტი ინფორმაცია ოქრუაშვილის საქმის შესახებ, ამერიკის ეროვნულ-დემოკრატიული ინსტიტუტი ამ საქმის მონიტორინგს ახორციელებს და შეძლებისდაგვარად ვიღებთ ყველა სახის ინფორმაციას. თავს შევიკავებთ, განვსაჯოთ ამ საქმის მიმდინარეობა, ჩვენ ყველა ამ საქმეს, მათ შორის, ხაზარაძისა და სხვა საქმეებსაც ყურადღებით ვაკვირდებით. კვლავაც ვიმეორებ, რომ პოლიტიკურ შეფასებას არ გავაკეთებ.", — განაცხადა მან.

თბილისის საქალაქო სასამართლომ 20 ივნისის აქციის საქმეზე ირაკლი ოქრუაშვილს აღკვეთის ღონისძიებად პატიმრობა შეუფარდა.

შინაგან საქმეთა სამინისტრომ თავდაცვის ყოფილი მინისტრი ირაკლი ოქრუაშვილი 20 ივნისის საქმეზე დააკავა. მას ჯგუფური ძალადობა ედება ბრალად. ოპოზიცია ოქრუაშვილის დაკავებას პოლიტიკურ რეპრესიებს უწოდებს.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 17 პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.