ინდური ავიაკომპანია IndiGo, რომელსაც ადგილობრივი ბაზრის 43,4 პროცენტი უკავია, წელს საქართველოს ავიაბაზარზე აღარ შემოვა. ფრენების დაწყების გადავადებაზე On.ge-ს TAV Georgia-ში განუცხადეს. ინფორმაცია თავდაპირველად bm.ge-მ გაავრცელა.

ტავში ამბობენ, რომ ავიაკომპანია ბაზარზე 2020 წელს შემოვა. მათი თქმით, უცნობია, რატომ გადაიფიქრა ავიაკომპანიამ ბაზარზე შემოსვლა.

ტურისტული კომპანია იბერა ტურს პლიუსის დამფუძნებელი, მაია მურაჩაშვილი bm.ge-სთან ამბობს, რომ ფრენების დაწყების გადავადების ერთ-ერთი მიზეზი სავიზო პრობლემები გახდა, რადგან, ინდოეთი ირანის შემდეგ მეორე ქვეყანაა, რომლის მოქალაქეებსაც საქართველოს საზღვრის კვეთაზე ყველაზე ხშირად ეუბნებიან უარს.

"ე.წ. რუსული ავიასანქციების პირობებში, ძალიან მნიშვნელოვანი იყო, რომ ინდიგოს წელს დაეწყო ფრენები, მაგრამ სამწუხაროდ, კომპანიამ გადაიფიქრა. ჩემი ინფორმაციით, მიზეზი სწორედ სავიზო თემებთან დაკავშირებული პრობლემები გახდა, რადგან თუ საქართველოში ვერ შემოვიდოდა ინდიგოს მგზავრი, კომპანია ვალდებული იყო, მას როგორც ავიაბილეთის საფასური, ასევე, კომპენსაცია გადაუხადოს", — ამბობს მურაჩაშვილი.