დიდი ბრიტანეთის დედოფალმა, ელისაბედ მეორემ ბუკინგემის სასახლეში კონსერვატიული პარტიის ლიდერი, ბორის ჯონსონი მიიღო. ტრადიციისამებრ, დედოფალმა ჯონსონს შესთავაზა, გამხდარიყო პრემიერ-მინისტრი და ახალი მთავრობა ჩამოეყალიბებინა. ელისაბედ მეორესთან აუდიენცია ნახევარ საათზე მეტხანს გაგრძელდა.

ლონდონის ყოფილმა მერმა და საგარეო საქმეთა ყოფილმა მინისტრმა პრემიერს თანამდებობაზე ტერეზა მეი შეცვალა.

ქვეყნის მასშტაბით თითქმის ორკვირიანი კენჭისყრების შემდეგ კონსერვატიული პარტიის ათეულობით ათასმა წევრმა პარტიის ლიდერად სწორედ ჯონსონი აირჩია. შედეგები 23 ივლისს გახდა ცნობილი.

ჯონსონის მთავარი კონკურენტი საგარეო საქმეთა მოქმედი მინისტრი ჯერემი ჰანტი იყო, თუმცა გამოკვეთილ ფავორიტად მაინც ჯონსონი მიიჩნეოდა. ბორის ჯონსონმა კონსერვატიული პარტიის წევრების 92 153 ხმა მიიღო, ხოლო ჯერემი ჰანტმა — 46 656. ჯონსონს გამარჯვება მიულოცა პრემიერ-მინისტრმა ტერეზა მეიმ და ბრექსიტის საკითხზე სრული მხარდაჭერა გამოთქვა.

ამ ეტაპისთვის ახალი პრემიერ-მინისტრის წინაშე მთავარ გამოწვევად ბრექსიტი დგას. ჯონსონი ამბობს, რომ ნებისმიერ შემთხვევაში დიდი ბრიტანეთი ევროკავშირს 31 ოქტომბერს დატოვებს.