თბილისში საზოგადოებრივი ტრანსპორტით საათნახევარი მგზავრობის საფასური, შესაძლოა, 80 თეთრიდან ერთ ლარამდე გაიზარდოს. ამის შესახებ ინტერპრესნიუსთან ინტერვიუში სისტრა სპექტრუმ კონსალტინგის ჯგუფის ხელმძღვანელმა, ასმათ აბესაძემ ისაუბრა. სწორედ ეს კომპანია მუშაობს თბილისის სატრანსპორტო სისტემის მოწყობის დოკუმენტზე.

ჯგუფის ხელმძღვანელის თქმით, მერია ახლა დათვლის პროცესშია, რომ დაადგინოს შეწონილი ტარიფი ავტობუსის, მეტროს და მიკროავტობუსის ფასის შერწყმით.

ასმათ აბესაძის თქმით, ინტეგრირებულ ტარიფში, [80-დან 1 ლარამდე] შევა მიკროავტობუსის საფასურიც:

"ვიღაცას მგზავრობა გაუიაფდება, ვიღაცას იგივე დარჩება. არავის მგზავრობა არ გაუძვირდება, მაგრამ გაუმჯობესდება მომსახურება".

მისივე ცნობით, მგზავრობა მხოლოდ ბარათით იქნება შესაძლებელი, მგზავრი ერთხელ გადაიხდის, ბარათის ვალიდაციას გააკეთებს და იმგზავრებს სხვადასხვა ტრანსპორტით.

სისტრა ჯგუფის ხელმძღვანელი ინტერვიუში აღნიშნავს იმასაც, რომ ბარათები შეიძლება იყოს ერთჯერადი მგზავრობის, ერთდღიანი, ერთკვირიანი, ერთთვიანი, 6-თვიანი და ერთწლიანი:

"ერთწლიანი ბარათის საფასური, ალბათ, იქნება ყოველდღიურ მგზავრობაზე გადანაწილებული ყველაზე იაფად ღირებული ბარათი. ყველაზე ძვირი ეღირება ერთჯერადი გავლა. დანარჩენი გავლიდან გამომდინარე, რაც უფრო ბევრ დღეზე გადაიხდი, უფრო დაბალი ტარიფი შეგხვდება. თუმცა ქვედა ზღვარი დაწესდება".