მოქმედი გენერალური პროკურორი შალვა თადუმაძე ამბობს, რომ ყოფილ მთავარ პროკურორს, ოთარ ფარცხალაძეს იცნობს და კარგი ურთიერთობა აქვს. თადუმაძემ თქვა, რომ ფარცხალაძის კომპეტენციას და სტანდარტს არ შეაფასებდა, თუმცა ის პოზიტიურად დაახასიათა.

თადუმაძემ განაცხადა, რომ ფარცხალაძე ძალიან ცოტა ხანი იყო უწყებაში რაიმე სტანდარტის დაწესებლად, მაგრამ მაინც აქვს მიღწევა. კერძოდ, მისი თქმით, ფარცხალაძემ უწყებაში გამჭვირვალე და ღია სისტემა დაამკვიდრა.

"ერთი რაც მან ნამდვილად დააწესა, და მე ამ სისტემაში ყოველდღიური ურთერთობით ვიცი, მან დააწესა შიგნით, სამართლიანი განწყობის სტანდარტი. დღეს ჩვენ შესაძლებობა გვაქვს, მიუხედავად იმ ვერტიკალისა, რაც პროკურატურაში არსებობს, გვქონდეს ძალიან მეგობრული, კოლეგიალური, ღია ურთიერთობები. მე ვფიქრობ, რომ იმ მოკლე ვადაში და დარწმუნებული ვარ, არამარტო ვფიქრობ, ეს არის ბატონი ოთარის დამსახურება. მან ეს სისტემა ჩამოაყალიბა იმ გამჭვირვალობით და იმ ღიაობით", — განაცხადა თადუმაძემ.

მოქმედმა გენერალურმა პროკურორმა განაცხადა, რომ ფარცხალაძის კომპეტენციასაც ვერ შეაფასებს, თუმცა აღნიშნა, რომ რადგან მას "ამხელა გამოცდილება აქვს", მიიჩნევს, რომ ის კვალიფიციურია "იმ ნაწილში, რა ნაწილშიც მუშაობდა".

ყოფილი პროკურორი რამდენიმე გახმაურებულ საქმეში, მათ შორის, რუსთავი 2-ის გავრცელებულ ფარულ ჩანაწერებში ფიგურირებს. გავრცელებულს ჩანაწერებში, სავარაუდოდ, სპორტის ყოფილი მინისტრი ლევან ყიფიანი ამბობს, რომ ფარცხალაძემ მასზე იძალადა. გარდა ამისა, მას თავდასხმასა და ფიზიკურ ძალადობაში ადანაშაულებდა აუდიტის სამსახურის ყოფილი უფროსი ლაშა თორდია.

ოპოზიციური პარტიები და არასამთავრობო ორგანიზაციები საუბრობდნენ იმაზეც, რომ ოთარ ფარცხალაძეს პროკურატურაში ისევ აქვს გავლენები და უწყებას მართავს.