გამარჯვებული საქართველოს ლიდერი, ირაკლი ოქრუაშვილი ამბობს, რომ 20 ივნისის ღამეს, პარლამენტში შესვლას ხელფასის ასაღებად აპირებდა. სასამართლოში გამოკითხვის დასრულების შემდეგ მან განმარტა, რომ 2003 წელს პარლამენტში დეპუტატი იყო და ხელფასი ჰქონდა ასაღები. ირაკლი ოქრუაშვილის თქმით, გამოკითხვაზე საკმაოდ კარგ, "სახუმარო ხასიათზე იყო".

"ვუთხარი, რომ წინიდან [შესვლას] იმიტომ ვაპირებდი, რომ მეგონა ბუღალტერია წინიდან იყო. მერე პოლიციელებმა მითხრეს, რომ არა, გვერდიდან არისო და ამიტომ გვერდიდან წავედი. ბოლოს პასუხი მივიღე, რომ ხელფასს არ მოგცემთო", — განმარტა ირაკლი ოქრუაშვილმა.

20 ივნისის აქციის დაშლის საქმეზე ირაკლი ოქრუაშვილი გამოკითხვაზე დღეს, 23 ივლისს მივიდა. ყოფილმა მინისტრმა და გამარჯვებული საქართველოს ლიდერმა, გამოძიების შეკითხვებს პასუხი მაგისტრი მოსამართლის თანდასწრებით გასცა. 20 ივნისის აქციის საქმეზე გამოძიება სისხლის სამართლის კოდექსის 225-ე მუხლით მიმდინარეობს, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს. 20 ივნისის საქმეზე გამოკითხვაზე ასევე დაბარებულები არიან ევროპული საქართველოს ლიდერი გიგი უგულავა და ნაციონალური მოძრაობის წევრი გიორგი ბარამიძე. ამავე საქმეზე ნაციონალური მოძრაობის ლიდერს, ნიკა მელიას პროკურატურამ ბრალი წაუყენა.