საქართველოში თურქმენეთის საელჩოს განცხადებით, პრეზიდენტი გურბანგულ ბერდიმუჰამედოვი ცოცხალია. როგორც საელჩოში On.ge-ს განუცხადეს, რუსეთში თურქმენეთის საელჩომ პრეზიდენტის გარდაცვალების შესახებ ცნობები უარყვო და თვითონაც ამ განცხადებას ეყრდნობიან.

გურბანგულ ბერდიმუჰამედოვის გარდაცვალების შესახებ ინფორმაცია მედიაში 21 ივლისს გავრცელდა. ევრაზიული პრობლემების ცენტრის დირექტორმა, ასლან რუბაევმა, რომელმაც პრეზიდენტის გარდაცვალების შესახებ ისაუბრა, ბოდიში მოიხადა და თავისი განცხადება უარყო.

ამავე დროს, რუსულმა გამოცემა Lenta-მ თავის წყაროებზე დაყრდნობით დაწერა, რომ პრეზიდენტი გერმანიაში ავადმყოფ დედასთან გაემგზავრა.

გურბანგული ბერდიმუჰამედოვი თურქმენეთის პრეზიდენტი 2006 წლის 21 დეკემბერს გახდა. პრეზიდენტ საფარმურატ ნიაზოვის გარდაცვალების შემდეგ ბერდიმუჰამედოვი მოვალეობის შემსრულებლად დაინიშნა. კონსტიტუციის თანახმად ეს თანამდებობა ოვეზგელდი ატაევს ეკუთვნოდა, თუმცა, მის წინააღმდეგაც აღძრეს სისხლის სამართლის საქმე. 2007 წელს ის 89,23 პროცენტით აირჩიეს პრეზიდენტად და ქვეყნის მეორე პრეზიდენტი გახდა. 2012 წლის არჩევნებში ხმების 97,14 პროცენტი მიიღო.