აშშ-ს პრეზიდენტი, დონალდ ტრამპი თავდასხმას აგრძელებს ოთხ კონგრესმენ ქალზე, რომლებიც მის პოლიტიკას აკრიტიკებენ. პრეზიდენტი მათგან ბოდიშის მოხდას ითხოვს მაშინ, როცა მას რასიზმში ადანაშაულებენ. ტრამპის განცხადება მიმართულია დემოკრატი კონგრესმენების ალექსანდრია ოკასიო-კორტესის, აიანა პრესლის, რაშიდა ტლაიბისა და ილჰან ომარის მიმართ.

"მე არ მჯერა, რომ ამ ოთხ კონგრესვუმენს ჩვენი ქვეყნის სიყვარული შეუძლია. საშინელი (სიძულვილით სავსე) განცხადებებისთვის მათ ბოდიში უნდა მოუხადონ ამერიკას (და ისრაელს). ისინი ანადგურებენ დემოკრატიულ პარტიას, მაგრამ არიან სუსტები და საკუთარ თავში არათავდაჯერებულები, რომლებიც ვერ გაანადგურებენ ჩვენს დიდებულ ერს!" — დაწერა დონალდ ტრამპმა ტვიტერზე.

რამდენიმე კვირის წინ დონალდ ტრამპმა ტვიტერზე მოუწოდა კონგრესმენ ქალებს, წინაპრების მშობლიურ ქვეყნებში დაბრუნდნენ და კრიმინალთან ბრძოლაში მათ დაეხმარონ და მხოლოდ ამის შემდეგ აკრიტიკონ აშშ. პრეზიდენტის ტვიტები რასისტულად და ქსენოფობიურად შეაფასეს.

14 ივლისს გამოქვეყნებული ტვიტების სერიაში დონალდ ტრამპი წერდა, რომ დემოკრატი კონგრესმენები "ყველაზე დიდებულ და ძლევამოსილ ამერიკელ ხალხს" ასწავლიან როგორ უნდა იმუშაოს მთავრობამ მაშინ, როცა მათ "მშობლიურ ქვეყნებში" კორუმპირებული ხელისუფლებაა.

პრეზიდენტს ტვიტში კონკრეტული სახელები და გვარები ნახსენები არ იყო, თუმცა ადგილობრივ მედიაში წერდნენ, რომ პრეზიდენტმა კონგრესმენი ქალები იგულისხმა, რომლებიც ეთნიკურ უმცირესობებს წარმოადგენენ და მათგან სამი აშშ-შია დაბადებული. ესენი არიან ნახევრად პუერტო-რიკოელი ალექსნადრია ოკასიო-კორტესი, პალესტინური წარმოშობის რაშიდა ტლაიბი, აფროამერიკელი აიანა პრესლი და ილჰან ომარი, რომელიც ამერიკაში ოჯახთან ერთად სომალიდან 12 წლის ასაკში გადავიდა.