თუ ნეტფლიქსის ესპანური სერიალის, La Casa De Papel-ის (Money Heist) მაყურებელი ხართ, მოემზადეთ — ხანგრძლივი ლოდინის შემდეგ პროფესორი და მისი კრიმინალების გუნდი მესამე სეზონით დღეს, 19 ივლისს დაგვიბრუნდნენ.

ქალაქებით დასახელებული მძარცველების გუნდმა პირველ ორ სეზონში უკვე წარმატებით გაძარცვა ესპანეთის სამეფო მონეტების ზარაფხანა და მილიარდობით ევრო ჩაიგდო ხელში. ისინი ახალი თავგადასავლებისთვის და დაბრკოლებების გადასალახად ემზადებიან.

გუნდში როგორც ძველ, ისე ახალ სახეებს ვიხილავთ. მათ უერთდება პროფესორის შეყვარებული და პოლიციის ყოფილი ინსპექტორი რაკელ მურილიოც, ახალი სახელით — ლისაბონი.

ფოტო: Netflix

ნეტფლიქსის ყველაზე პოპულარული უცხოენოვანი სერიალის მესამე სეზონის დასაწყისში სალვადორ დალის ნიღბიანი კრიმინალები მილიონერები არიან და სამყაროს სხვადასხვა წერტილში ისე ცხოვრობენ, როგორც ყოველთვის ოცნებობდნენ. თუმცა პოლიციელები ახერხებენ და ერთ-ერთ პერსონაჟს, რიოს (მიგელ ჰერანი) აპატიმრებენ.

ტოკიო (ურსულა კორბერო) პროფესორს ატყობინებს რიოს დაკავების შესახებ, რომელიც ხელმეორედ უყრის თავს მთელ გუნდს. გადაარჩენენ ისინი გუნდის წევრს და რისკის ქვეშ დააყენებენ საკუთარ ცხოვრებას? ამ კითხვებზე პასუხებს ახალი ეპიზოდებიდან გავიგებთ.

ქაღალდის სახლის მესამე სეზონში 8 ახალი სერია გველოდება და როგორც წესი, ნეტფლიქსი ყველა სერიას ერთად შემოგვთავაზებს. იქამდე, სანამ ღამეებს გაათენებთ, შეგიძლიათ ნახოთ 3 ივნისს გამოსული ტრეილერი, რომლის ბოლოსაც ახალი სეზონის ერთ-ერთი მთავარი საიდუმლო, ბერლინის პერსონაჟი გელით.