აქცია #სირცხვილიაზე მწერალმა, ლაშა ბუღაძემ სკოლებში დედა ენის დაბრუნება პოპულისტურ ნაბიჯად შეაფასა. მისი თქმით, ხელისუფლებამ ზედაპირული ნაბიჯი გადადგა არჩევნებზე ხმების მისაღებად.

"ფიქრობენ არჩევნებზე, ხმების არდაკარვაზე, ამიტომაც ელაქუცებიან, უკაცრავად და, საზოგადოებას, რაღაც ჯგუფებს და ეს არის პოპულიზმი. არსად იაკობ გოგებაშვილის დედა ენა არ წასულა და ვერსად წავა, ეს შეუძლებელია... მაშინ საქართველო აღარ იარსებებს", —განაცხადა მან.

დედა ენის სკოლებში დაბრუნებაზე კანონპროექტი ჯერ კიდევ ნოემბერში შეიმუშავეს. 15 ივლისს კი მმართველი პარტიის დეპუტატმა, სოფო კილაძემ დაპოსტა, რომ წიგნი სკოლებში დააბრუნეს.

აქცია #სირცხვილიას 28-ე დღეს პარლამენტთან წიგნის დღე იმართება. დემონსტრანტებს და სხვა მსურველებს გამომცემლობა არტანუჯის, ინტელექტის, ბაკურ სულაკაურის, ჟურნალ ინდიგოს, მაღაზია სანტა-ესპერანსას და დამოუკიდებელი ბუკინისტების წიგნების შეძენა შეუძლიათ.

ამავე თემაზე: გოგებაშვილის მეთოდის პარადოქსი