პროკურატურის ინფორმაციით, 20 ივნისის აქციის დაშლის საქმეზე შინაგან საქმეთა სამინისტროს ერთი თანამშრომელი მოქალაქეზე ძალადობის ბრალდებით დააკავეს. საუბარია შსს-ს იმ თანამშრომელზე, რომელიც აქციის მონაწილეზე მანქანაში ჩასმამდე ძალადობს და სახეში მუშტს ურტყამს.

"საქმეზე ჩატარებული გამოძიების შედეგად მოპოვებული მტკიცებულებებით დგინდება, რომ 2019 წლის 21 ივნისს, გამთენიისას, რუსთაველის გამზირზე, შინაგან საქმეთა სამინისტროს აღნიშნულმა თანამშრომელმა გადაამეტა თავის სამსახურებრივ უფლებამოსილებას და ფიზიკურად იძალადა ადმინისტრაციული სამართალდარღვევის ჩადენისთვის დაკავებულ პირზე", — აღნიშნულია პროკურატურის მიერ გავრცელებულ ინფორმაციაში.

უწყებაში განმარტეს, რომ სასამართლოს ამ პირისთვის აღკვეთის ღონისძიებად პატიმრობის შეფარდების მოთხოვნით მიმართავენ.

საქმეზე გამოძიება სისხლის სამართლის კოდექსის 333-ე მუხლის მესამე ნაწილის "ბ" ქვეპუნქტით მიმდინარეობს. ამ მუხლით ძალადობით სამსახურებრივი უფლებამოსილების გადამეტება ისჯება თავისუფლების აღკვეთით ვადით ხუთიდან რვა წლამდე.

20 ივნისის აქცია სპეცრაზმმა ძალის გადამეტებით დაშალა, რა დროსაც მინიმუმ 160 მოქალაქე, მათ შორის მინიმუმ 30 ჟურნალისტი დაშავდა. სპეცრაზმელების ტყვიამ ორ მოქალაქეს თვალი დააკრგინა.