აღმოჩნდა, რომ ციხიდან გასაქცევად მხოლოდ გვირაბის გასათხრელი იარაღები და მონდომება სულაც არაა საკმარისი, რადგან, დიდი შანსია, რომ თავისუფლების ნაცვლად, ბოლოს მაინც დაცვასთან ამოჰყოთ თავი.

ცოტა ხნის წინ არგენტინაში, ბუენოს-აირესის ერთ-ერთი ციხის პატიმრებმა გაქცევა დაგეგმეს და საკუთარი საკნიდან რამდენიმე დღის განმავლობაში გვირაბს დაუღალავად თხრიდნენ — მართალია, გვირაბი ციხის შენობის გარეთ გადიოდა, თუმცა, მისი ბოლო სულაც არ იყო ისეთი შეუმჩნეველი, როგორც ეს პატიმრებს ეგონათ.

მიუხედავად თავდაუზოგავი შრომისა, პატიმრებს აღარ მიეცათ გვირაბით სარგებლობისა და გაქცევის შესაძლებლობა, რადგან ციხის თანამშრომლებმა მალევე შენიშნეს მათი საეჭვო აქტივობები და გვირაბის შესწავლაც დაუყოვნებლივ დაიწყეს.

მომხდარიდან მალევე გამოვლინდა გაქცევის მცდელობაში ეჭვმიტანილი შვიდი პატიმარი, რომელთა უმრავლესობაც 2021/2022 წლებში უნდა გათავისუფლებულიყო — პატიმრებს კიდევ ერთხელ წაუყენეს ბრალი და დანარჩენ 1540 მსჯავრდებულთან ერთად ქვეყნის შვიდ სხვადასხვა სასჯელაღსრულების დაწესებულებაში გადაანაწილეს.

აღსანიშნავია, რომ გამოძიების ფარგლებში მიმდინარეობს ციხის იმ თანამშრომლების ძებნაც, რომლებიც პატიმრებს ციხიდან გასაქცევად გვირაბის გათხრაში ეხმარებოდნენ ან ხელს უწყობდნენ.