თბილისის მერის მოადგილის, მაია ბითაძის განცხადებით, ბოგდანის ყვითელ ავტობუსებს, რომლებიც ტექნიკურ ინსპექტირებას ვერ გაივლიან, ჯართში ჩააბარებენ. ამის შესახებ ბითაძემ ინტერპრესნიუსთან ინტერვიუში თქვა.

"ავტობუსები, რომლებიც ვერ გაივლიან ტექნიკურ ინსპექტირებას ჩანაცვლების მომენტში, ან ისეთი ავტობუსები, რომლებიც ვიცით, რომ ხშირად ექვემდებარებიან შეკეთებას, რაც არახარჯთსარგებლიანია როგორც გარემოს დაცვის, ასევე ფინანსური თვალსაზრისით, ასეთი ავტობუსები, ბუნებრივია, ჩამოიწერება საერთოდ და მოხდება ჯართში ჩაბარება", — ამბობს ბითაძე.

მისივე განცხადებით, ავტობუსები, რომელთა სიცოცხლისუნარიანობა 5-6 წელს ითვლის, შემოწმების შედეგად, შესაძლებელია გადანაწილდეს. თუმცა, მისივე თქმით, ამ ავტობუსებზე დიდ იმედებს ვერ ამყარებენ და უმრავლესობა ჩამოსაწერია.