ამერიკის შეერთებული შტატების მთავრობამ საქართველოს საჩუქრად გადასცა აილენდის კლასის ორი საპატრულო კატარღა. აშშ-ის სანაპირო დაცვის სამსახურის მიერ საქართველოს შინაგან საქმეთა სამინისტროს სანაპირო დაცვისთვის კატარღების გადაცემის ცერემონია 30 სექტემბერს, მერილენდის შტატის ქალაქ ბალტიმორში გაიმართა. შეერთებული შტატების მთავრობამ ამ საჩუქრის მიმღებად პირველ ქვეყანად საქართველო შეარჩია ორ ქვეყანას შორის არსებული გამორჩეული სტრატეგიული პარტნიორობის დასაფასებლად და ხაზგასასმელად. ინფორმაციას ფაქტის შესახებ ამერიკის ხმა ავრცელებს.

საქართველოს მთავრობა აცხადებს, რომ კატარღები 16-წევრიან ეკიპაჟებზეა გათვლილი და ისინი მკვეთრად გაზრდის ქვეყნის სასაზღვრო პოლიციის მუშაობის ეფექტურობას. გემები, რომლებიც გამორჩეულად ეკონომიური და ავტონომიურია, საქართველოს სანაპირო დაცვის სამსახურს საშუალებას მისცემს მონაწილოება მიიღოს შავი ზღვის აუზის პარტნიორი ქვეყნების საწვრთნელ პროგრამებში და ერთობლივ ოპერაციებში.

ამერიკის სანაპირო დაცვის მეთაურის მოადგილე და ვიცე-ადმირალი სტეისი სტოსი აცხადებს, რომ გემების გადაცემა იმ ახლო სტრატეგიული პარტნიორობის კიდევ ერთი დასტურია, რომელიც ამერიკასა და საქართველოს შორის უკვე წლების მანძილზე არსებობს. „გემები შავი ზღვის მთელი რეგიონის უსაფრთხოებას გააძლიერებს და ის ამერიკელ და ქართველ ხალხს შორის თანამშრომლობის ხარისხს კიდევ უფრო გაზრდის,“ დასძინა ვიცე-ადმირალმა.

როგორც ამერიკის ხმა წერს, საქართველო პირველი ქვეყანაა, რომელსაც შეერთებულმა შტატებმა საპატრულო კატარღები აჩუქა. კატარღების საქართველოში ჩამოტანა მომავალი ზაფხულისთვისაა დაგეგმილი. მათი ღირებულება 1,5 მილიონ დოლარს შეადგენს, რომელსაც ამერიკა საქართველოს გრანტის სახით გადასცემს. დამატებით დაახლოებით ნახევარი მილიონი დოლარი დაჯდება გემების აღჭურვა და საქართველოში გაგზავნა. ამ ხარჯის ნაწილს ამერიკის სახელმწიფო დეპარტამენტი ფარავს.

მას შემდეგ, რაც გემები სრულ სამუშაო მზადყოფნაში მოვა, ეკიპაჟის წევრები ამერიკაში ჩავლენ და 10 კვირიან სასწავლო კურსს გაივლიან.