პარტია ქართული ოცნების აღმასრულებელმა მდივანმა ირაკლი კობახიძემ, 3 სექტემბრის ბრიფინგზე განაცხადა, რომ ტელეკომპანია რუსთავი 2-მა ყოფილი პრემიერის, ბიძინა ივანიშვილის კონტექსტიდან ამოვარდნილი სიტყვები გააშუქა და მაყურებელს არასწორი ინფორმაცია მიაწოდა:

"გაყალბდა ბიძინა ივანიშვილის სიტყვები, რომელიც ისე იყო წარმოჩენილი, თითქოს ის მიიჩნევდა რომ ნაციონალურ მოძრაობას 30 პროცენტიანი რეიტინგი ჰქონდა. სინამდვილეში კონტექსტს იყო მოწყვეტილი ეს ყველაფერი. ბიძინა ივანიშვილმა თქვა, რომ ნაციონალური მოძრაობის მხარდაჭერა შეადგენს 150 000-200 000 კაცს, რაც პროცენტულად ბევრად ნაკლებია, ვიდრე 30 პროცენტი".

ირაკლი კობახიშე ამბობს, რომ ნიკა გვარამიას ბიძინა ივანიშვილის სიტყვების გაყალბება, ასევე გაყალბებული კვლევის შესაფუთად დასჭირდა.

"გაყალბებულია ასევე იმ კვლევის მაჩვენებლები, რომელიც გავრცელდა რუსთავი 2-ის მეშვეობით".

კობახიძე რუსთავი 2-ის ჟურნალისტებს ადანაშაულებს და ამბობს, რომ ისინი ქართული ოცნების წარმომადგენლების შეცდომაში შეყვანას ცდილობდნენ:

"ისინი სხვადასხვა ფორმით ცდილობდნენ ჩამჭრელი კითხვების დასმას და იმის დადასტურებას ჩვენი მხრიდან, რომ 30 პროცენტიანი რეიტინგი შეესაბამდებოდა ნაციონალურ მოძრაობას".