რუსული პროპაგანდისტული ტელეარხი Russia Today და საინფორმაციო სააგენტო Sputnik ლონდონში პრესის თავისუფლების შესახებ გამართულ კონფერენციაზე არ დაუშვეს. RT და Sputinik რუსეთის ხელისუფლების მიერ მხარდაჭერილი მედიასაშუალებებია.

როგორც BBC-ს რუსული ბიურო დიდი ბრიტანეთიის საგარეო საქმეთა სამინისტროზე დაყრდნობით წერს, მიზეზი დეზინფორმაციის გავრცელებაში ამ ორი მედიასაშუალების აქტიური როლი გახდა. კონფერენციის ორგანიზატორი სწორედ საგარო უწყებაა.

Global Conference for Media Freedom-ის კონფერენციაში ათასამდე ჟურნალისტმა, სამოქალაქო სექტორისა და მთავრობის წარმომადგენლებმა უნდა მიიღონ მონაწილეობა . დიდი ბრიტანეთის საგარეო საქმეთა სამინისტრომ, რომელიც კონფერენციის ორგანიზატორია, განაცხადა რომ RT-სა და Sputnik-ს აკრედიტაციაზე უარი უთხრა.

ლონდონში რუსეთის საელჩო ამ გადაწყვეტილებას პოლიტიკური მოტივით რუსული ტელეარხების პირდაპირი დისკრიმინაცია უწოდა. კრემლის პრესსპიკერმა კი თქვა, რომ ეს აბსურდია. RT-ის გენერალურმა რედაქტორმა, მარგარიტა სიმონიანმა განაცხადა, რომ "დეზინფორმაციის არც ერთი მაგალითი არ მოუყვანიათ".