ვუდი ალენი ლა სკალას საოპერო სახლში სპექტაკლის - Gianni Schicchi-ს დასადგმელად ემზადება, რომელშიც ქუთაისელი სოპრანო, 25 წლის ცისანა გიორგაძე ცნობილ ბარიტონ, ამბროჯიო მაესტროსთან ერთად წარსდგება.

რადიო თავისუფლებასთან საუბრისას მომღერალმა ღონისძიების დეტალებზე ისაუბრა:

უკვე დავასრულეთ რეპეტიციები. სპექტაკლი 15 ივლისს გვაქვს. ეს ჩემი დებიუტია ლა სკალაში. ძალიან დიდი პატივია, რომ ვუდი ალენის დადგმულ სპექტაკლში მივიღებ მონაწილეობას. მოსწონს ჩვენი შესრულება, თუმცა, შენიშვნებიც მოგვცა. ემოციური და ამაღელვებელი განწყობა მაქვს

რეჟისორს პრეს კონფერენციაზე აპლოდისმენტებით შეხვდნენ. როგორც ჩანს, #MeToo კამპანიის და სექსუალური ხასიათის ბრალდებების მიუხედავად, 83 წლის ალენისადმი ჰოლივუდისგან განსხვავებით ევროპაში განწყობები არ შეცვლილა.

ამერიკის შეერთებულ შტატებში კი ამ ამბების შემდეგ ვუდი ალენთან Amazon Studios-მა მისი ბოლო ფილმის A Rainy Day in New York-ის სადისტრიბუციო კონტრაქტი გააუქმა. ფილმის პრემიერა ევროპაში შემოდგომაზე შედგება. ამ ფილმში მონაწილე ორმა მსახიობმა კი განაცხადა, რომ აღებულ ჰონორარს ისინი სექსუალურ ძალადობასთან მებრძოლი ორგანიზაციების ფონდებში გადარიცხავენ.

ლა სკალას ამბების პარალელურად მილანის კინო მუზეუმი ვუდი ალენის ფილმების რეტროსპექტივას აჩვენებს, ჯამში 28 ფილმს. რეჟისორის განცხადებით სპექტაკლის პრემიერის შემდეგ, ის ესპანეთში, კერძოდ სან სებასტიანში აპირებს გამგზავრებას ახალ ფილმზე სამუშაოდ, რომელშიც კრისტოფ ვალციც ითამაშებს.