გვიან ღამით ზუგდიდის რაიონის სოფელ დიდნეძში ქართული ოცნების აქტივისტებს ფიზიკურად იმ დროს გაუსწორდნენ, როცა ისინი სოფელში სააგიტაციო მასალას არიგებდნენ. ქართული ოცნება მომხდარში დიდნეძში ერთიანი ნაციონალური მოძრაობის შტაბის უფროსს, პაპუნა კუკავასა და პარტიის სხვა მხარდამჭერებს ადანაშაულებს.

ნაცემი ახალგაზრდებში ზუგდიდის რესპუბლიკურ საავადმყოფოში მოინახულა ჯანდაცვის მინისტრის მოადგილემ, ვალერი კვარაცხელიამ, რომლის თქმითაც, სამი დაშავებულიდან ერთი უკვე სახლში გაწერეს, ორი კი ამ დრომდე საავადმყოფოში რჩება ტვინის შერყევის დიაგნოზით.

ქართული ოცნების ზუგდიდის მაჟორიტარი დეპუტატობის კანდიდატის, მერაბ ქვარაიას თქმით, ოცნების აქტივისტებს ნაცმოძრაობის აქტივისტები დაესხნენ თავს:

"ისინი თავს დაესხნენ ამ ახალგაზრდებს, სასტიკად გაუსწორდნენ მათ, რა დროსაც ნაცემია 3 ახალგაზრდა, მათ შორის სასტიკად ნაცემია 19 წლის გოგონა, რომელიც უგონო მდგომარეობაში გადაიყვანეს საავადმყოფოში, ორ მათგანს მიღებული აქვს თავის ტვინის შერყევა, მიმდინარეობს მკურნალობა".

მომხდარ ფაქტს პროვოკაციად აფასებს ერთიანი ნაციონალური მოძრაობის წევრი თენგიზ გუნავა: "როგორც მაქვს ინფორმაცია, ჩვენი შტაბის უფროსი პაპუნა კუკავა სოფელ დიდნეძში გადაადგილდებოდა თავისი მანქანით, რად დროსაც ქართული ოცნების წარმომადგენელი ახალგაზრდები თავიანთი სააგიტაციო პროგრამით მოძრაობდნენ. მე როგორც ვიცი, პრაქტიკულად გზა ჰქონდათ ათვისებული, რა დროსაც პაპუნამ მანქანა ვერ გაატარა, თხოვა მათ, რომ გაეტარებინათ, მათგან ცოტა უხეში შეპასუხება მიიღო".

გუნავას მტკიცებით, სწორედ ამ ფაქტს მოჰყვა ფიზიკური დაპირისპირება.

შინაგან საქმეთა სამინისტრომ გამოძიება დაიწყო სისხლის სამართლის კოდექსის 125–ე მუხლის მიხედვით, რაც ცემას გულისხმობს. მოწმის სახით დაიკითხნენ ინციდენტში მონაწილე პირები.