რუსთავი 2-ის შენობასთან საპროტესტო აქცია განახლდა. აქციის ორგანიზატორები ისევ ითხოვენ, რომ გენერალურმა დირექტორმა ნიკა გვარამიამ და ჟურნალისტმა გიორგი გაბუნიამ არხი დატოვონ.

აქცია ტელევიზიასთან 7 ივლისის ღამეს მას შემდდეგ მოეწყო, რაც ჟურნალისტმა გიორგი გაბუნიამ საავტორო გადაცემა P.S.-ში რუსეთის პრეზიდენტ ვლადიმერ პუტინს აგინა. არხი ჟურნალისტის განცხადებას გაემიჯნა, ხოლო თვითრეგულირების ორგანომ გაბუნიას ორი თვით უფლებამოსილება შეუწყვიტა.

ფოტო: სალომე ჩიკვილაძე / On.ge

პუტინის გინება, რ2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედერაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემიჯნა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

გაბუნიას განცხადება პროვოკაციად შეფასეს რუსეთშიც. რუსეთის დუმის დეპუტატები ჟურნალისტის სამართლებრივ დასჯას ითხოვენ, ხოლო საკანონმდებლო ორგანოს სპიკერი აცხადებს, რომ ჟურნალისტი რუსეთში უდა ექსტრადირდეს.

ამ ყველაფერს მალევე გამოეხმაურა გინების ადრესატი, ვლადიმერ პუტინი, რომელმაც განაცხადა, რომ "ასეთი [გიორგი გაბუნიას] ადამიანების წინააღმდეგ საქმის აღძვრა დიდი პატივია".

ამავე თემაზე: