ანტიდასავლური, პრორუსული, ჰომოფობიური და ქსენოფობიური გზავნილები პატრიოტთა ალიანსის ყრილობაზე

პატრიოტთა ალიანსმა სპორტის სასახლეში ყრილობა გამართა, რომელზეც ტრადიციულად პრორუსული და ანტიდასავლური გზავნილები გააჟღერეს. გარდა ამისა პარტიის ლიდერებმა ჰომოფობიური, ქსენოფობიური და შეურაცხმყოფებლი განცხადებებიც გაავრცელეს.

დავით თარხან-მოურავმა სცენიდან ისევ ისაუბრა სამხედრო მიუმხრებლობისა და რუსეთთან დიალოგის აუცილებლობაზე. ამ განცხადებებს პარტიის მხარდამჭერები ოვაციებით ხდებოდნენ. გარდა ამისა ის აცხადებდა, რომ ოკუპანტი ქვეყანა მხოლოდ რუსეთი არ არის, მან ოკუპაციაში უსაფუძვლოდ დაადანაშაულა თურქეთიც.

"მთელი აჭარა და პლეხანოვი თურქეთია. რატო არ გაწერიათ თურქეთი ოკუპანტია", — ამბობდა ის.

ყრილობაზე თარხან-მოურავი შეურაცხმყოფელად მოიხსენიებდა ოპოზიციურ პარტიებსა და ლგბტ თემსაც.

"მე მინდა მივმართო ნაციონალურ მოძრაობას, იქაც ხომ არის ნორმალური ხალხი, კაცო. რა გინდათ იმ პარტიაში, რომელიც ნახევრად ელგებეტე პარტიაა?", — განაცხადა მან.

თარხან-მოურავმა ჰომოფობიურად მიმართა პარლამენტთან შეკრებილ აქცია #სირცხვილიას მონაწილეებსაც.

"იმ ახალგაზრდებს მინდა ვუთხრა, იმ აქციაზე რა გინდა, სადაც ეს ელგებეტე და გეები დგანან. გამაგებინე რა გინდა იქ", — განაცხადა მან და დაამატა, რომ მათ სურთ რწმენა და დედა ეკლესია და არა ლგბტ თემი.

ყრილობაზე პარტიამ კიდევ რამდენიმე მთავარი მოთხოვნა გააჟღერა. მათ შორისაა: არა ქართულ ოცნებას და "მასთან გარიგებულ ბოკერიას გუნდს" და არა ნაციონალურ მოძრაობას.

პატრიოტთა ალიანსი ამტკიცებდა, რომ რუსი დეპუტატის სერგეი გავრილოვის ვიზიტი და შემდგომ განვითარებული მოვლენები მმართველმა პარტიამ ევროპულ საქართველოსთან ერთად დადგა. ამის მტკიცებულებად კი მათ ის მოიყვანეს, რომ პროტესტი მონაწილეებს ჰქონდათ ტრანსპარანტები, რომელიც წინასწარ დამზადებული ჰგონიათ.

მათი თქმით, ამ სპექტაკლით ისარგებლა ნაციონალურმა მოძრაობამ და დესტაბილიზაცია მოახდინა. ამიტომ პარტიამ მოითხოვა ქართულმა ოცნებამ დატოვოს ხელისუფლება და დაისაჯოს ბოკერია და სააკაშვილი.