სახალხო დამცველის აპარატმა 20-21 ივნისს შინაგან საქმეთა სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების საქმეზე მიმდინარე სისხლის სამართლის საქმის შესწავლა დაიწყო.

სახალხო დამცველის აპარატის განცხადებით, ისინი ყურადღებას მიაქცევენ იმას, ჩატარდა თუ არა ყველა აუცილებელი საგამოძიებო/საპროცესო მოქმედება, ეს მოქმედებები ჩატარდა თუ არა დროულად და ხომ არ არის სახეზე გამოძიების პროცესის არაგონივრული გაჭიანურება, ჩატარებული საგამოძიებო მოქმედებები ტარდებოდა თუ არა ჯეროვანი გულისხმიერებით და ამომწურავად. გარდა ამისა, აპარატში ამბობენ, რომ ახლადდაწყებული საქმის გამოძიების შესწავლისა და რეკომენდაციების გაცემის პრაქტიკა სახალხო დამცველს არ ჰქონია:

"20-21 ივნისის ფაქტების გამოძიების პროცესში სახალხო დამცველს მოუწევს შეაფასოს მიმდინარე სისხლის სამართლის საქმის მასალები გამოძიების პროცესის კვალდაკვალ. მიუხედავად ამ მიმართებით შესაბამისი გამოცდილების არ ქონისა, სახალხო დამცველის აპარატი გააკეთებს ყველაფერს, რათა გამოძიება ადამიანის უფლებების სტანდარტების შესაბამისად შეაფასოს და მიმდინარე რეჟიმში და საბოლოოდ მიაწოდოს რეკომენდაციები სისხლის სამართლის საქმის ზედამხედველ პროკურორებს".

გამოძიების მონიტორინგის ეფექტურობისა და გამჭვირვალობის მიზნით სახალხო დამცველი შექმნის საკონსულტაციო საბჭოს, რომლის შემადგენლობაში სხვადასხვა ჯგუფი, არასამთვრობო ორგანიზაციები და პროფესიული წრეები იქნებიან წარმოდგენილი.

აქციის დაშლის დროს სამართალდამცავების მხრიდან უფლებამოსილების სავარაუდო გადამეტებაზე გენერალურმა ინსპექციამ გამოძიება უკვე დაიწყო, შინაგან საქმეთა სამინისტროს განცხადებით, დაშლაში მონაწილე 10 სამართალდამცავს უფლებამოსილება შეუჩერდა. მათი განმარტებით, აქედან 2 პირის ქმედებაში გამოიკვეთა სისხლის სამართლის დანაშაულის ნიშნები, ამიტომ მოპოვებული მასალები გადაიგზავნა გენერალურ პროკურატურაში.