თბილისის მერია რუსთაველის გამზირის რეაბილიტაციის დროს, მეტროსადგურ "თავისუფლების მოედანსა" და საქართველოს ეროვნულ მუზეუმს შორის არსებულ საგზაო მონაკვეთში, აგურის წყობებისა და კერამიკული ჭურჭლის აღმოჩენის ფაქტს ეხმაურება და წერს, რომ რუსთაველის გამზირის რეაბილიტაციისას აღმოჩენილი არტეფაქტების შესახებ ინფორმაცია მიეწოდა კულტურული მემკვიდრეობის დაცვის ეროვნულ სააგენტოს, რის შემდეგაც სპეციალისტებმა გასცეს სათანადო რეკომენდაციები.

"დედაქალაქში განხორციელებული თუ მიმდინარე ინფრასტრუქტურული პროექტების დროს, არქეოლოგიური ფენებისა და არტეფაქტების გამოვლენისას, თბილისის მერია მჭიდროდ თანამშრომლობს კულტურული მემკვიდრეობის დაცვის ეროვნულ სააგენტოსთან და შემდგომ გადაწყვეტილებებს სწორედ მისი რეკომენდაციების საფუძველზე იღებს.

ბუნებრივია, რუსთაველის გამზირის რეაბილიტაციის პროცესში აღმოჩენილი არტეფაქტების შესახებ ინფორმაციაც დაუყოვნებლივ მიეწოდა კულტურული მემკვიდრეობის დაცვის ეროვნულ სააგენტოს. შეტყობინების საფუძველზე, სააგენტოს შესაბამისი დარგის სპეციალისტებმა მყისიერად მოახდინეს რეაგირება — ადგილზე დაათვალიერეს აღმოჩენილი ობიექტები და გასცეს სათანადო რეკომენდაციები.

აღნიშნულ მონაკვეთზე სამუშაოები სწორედ გაცემული რეკომენდაციების შესაბამისად განხორციელდება", — წერია მერიის მიერ გავრცელებულ განცხადებაში.

შეგახსენებთ, რომ მანამდე "მოძრაობამ კულტურული მემკვიდრეობისთვის" კულტურის სამინისტროს, კულტურული მემკვიდრეობის დაცვის ეროვნულ სააგენტოსა და თბილისის მერიას მოუწოდა, დაუყოვნებლივ დაეწყოთ კონსულტაციები კანონით განსაზღვრულ ვადებში რუსთაველის გამზირზე გამოვლენილი არქეოლოგიური ფენებისა თუ არტეფაქტების შესასწავლად და პროექტის მიმდინარეობისას საზედამხედველო პროცესის უკეთ კოორდინირებისთვის. მათივე ცნობით, მეტროსადგურ "თავისუფლების მოედანსა" და საქართველოს ეროვნულ მუზეუმს შორის მონაკვეთში აღმოჩენილია აგურის წყობა სავარაუდოდ მე-19 საუკუნის ძველი გარეთუბნის კოლექტორთა სისტემაა, კერამიკის ჭურჭელი კი შესაძლოა X-XI საუკუნეებს განეკუთვნებოდეს.