დღეიდან, როცა ფაბრიკასთან ჩაივლით, შეგიძლიათ თვალი შეავლოთ ახალ სტრიტარტს, რომელიც ქართველ მხატვრებს, დანტესა და გამეზას ეკუთვნით.

ნახატები 20-21 ივნისის მოვლენებთანაა დაკავშირებული, როცა პოლიციის მიერ აქციის ძალის გადამეტებით დაშლისას რამდენიმე ადამიანმა თვალის მძიმე დაზიანება მიიღო.

ნახატები ეძღვნებათ მაკოს და გიორგის — მათ, ვინც 20 ივნისის აქციაზე თვალი დაკარგეს.

18 წლის მაკო გომური, რომელმაც ცალი თვალი დაკარგა, ამჟამად სამკურნალოდ ევროპაშია. ჭრილობების შეხორცების შემდეგ გაირკვევა, შეძლებენ თუ არა სპეციალისტები მისთვის ხელოვნური თვალის ჩასმას. მაკო საკუთარი განცხადებების გამო პროტესტის ერთ-ერთ სიმბოლოდ იქცა.

ერთ-ერთი ნამუშევრის ავტორი გამეზა ამბობს, რომ ეს ნახატი არის უპირველესად მხარდაჭერა იმ კონკრეტული ადამიანების, რომლებიც დაზარალდნენ, თუმცა ამავე დროს ზოგად იდეასაც გამოხატავს. "მხარდაჭერის მრავალ ფორმას შორის, ეს ერთ-ერთია".

20 ივნისის აქცია

რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა პარლამენტის წინ. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყო On.ge-ს სამი თანამშრომელი.