საქართველოს პარლამენტის ყოფილი თავმჯდომარე, ირაკლი კობახიძე შინაგან საქმეთა მინისტრის გიორგი გახარიას მხრიდან მოწმეებზე შესაძლო ზემოქმედების საფრთხეზე ამბობს, რომ ეს "სხვა შემთხვევაა". საქმე ეხება 20 ივნისის აქციის დაშლის დროს სამართალდამცავების მხრიდან ძალის გადამეტებას.

— თქვენ თუ აიღეთ პასუხისმგებლობა, გახარიამ არ უნდა აიღოს?
— ეს არის ორი სხვადასხვა შემთხვევა.
— თუ ნიკა მელიას შემთხვევაში არსებობდა საფრთხე, რომ მოწმეებზე ჰქონოდა ზემოქმედება, გახარიას შემთხვევაში ხედავთ თუ არა?
— ორი სხვადასხვა შემთხვევაა.

კობახიძემ აღარ უპასუხა On.ge-ს ჟურნალისტის დამზუსტებელ კითხვას, რატომ მიაჩნია, რომ "ეს არის ორი განსხვავებული შემთხვევა".

20 ივნისს რუსმა დეპუტატმა საქართველოს პარლამენტში პარლამენტის თავმჯდომარის სკამი დაიკავა. იმავე საღამოს რუსთაველის გამზირზე მოქალაქეები შეიკრიბნენ და პარლამენტის თავმჯდომარის გადადგომა მოითხოვეს. აქცია პოლიციამ ძალის გადამეტებით დაშალა. მეორე დღეს კი თანამდებობიდან გადადგა ირაკლი კობახიძე. 21 ივნისიდან მოქალაქეები შინაგან საქმეთა მინისტრის გადადგომასაც ითხოვენ, თუმცა უშედეგოდ.