ეროვნული ბიბლიოთეკის მოძრაობა ეკვილიბრიუმი ზუგდიდის მუნიციპალიტეტის სოფლებს, ჯიხაშკარსა და კორცხელს ესტუმრა. ამ სოფლების ახლადაღდგენილი ბიბლიოთეკები უახლესი ლიტერატურით მომარაგდა.

ფოტო: ეროვნული ბიბლიოთეკა

"2018 წელს ბიბლიოთეკების აღდგენის თხოვნით მივმართეთ ადგილობრივ ხელისუფლებას. ვითხოვდით ფართის გამოყოფას და შტატის დაშვებას. ჩვენი თხოვნა დაკმაყოფილდა და კორცხელისა და ჯიხაშკარის ბიბლიოთეკები აღდგა.

გიორგი კეკელიძემ სწორედ ეს ბიბლიოთეკები მოინახულა. ეკვილიბრიუმმა გადმოგვცა როგორც მხატვრული, ისე დარგობრივი ლიტერატურა. ამ ბიბლიოთეკების პარალელურად აღდგა ასევე დიდი ნეძისა და ორულუს ბიბლიოთეკები. თავის დროზე ზუგდიდის მუნიციპალიტეტის 47 ბიბლიოთეკა დაიხურა. შემდეგ ეტაპობრივად დავიწყეთ მათი აღდგენა.

ამჟამად, ზუგდიდის მუნიციპალიტეტში 26 სოფლის ბიბლიოთეკაა აღდგენილი, ასევე გაიხსნა საქალაქო ბიბლიოთეკის ორი ახალი ფილიალი. სულ ზუგდიდში საქალაქო ბიბლიოთეკის სამი ფილიალი ფუნქციონირებს. მუნიციპალიტეტის საბიბლიოთეკო ქსელს კოორდინირებას უწევს ზუგდიდის ცენტრალური ბიბლიოთეკა. ბიბლიოთეკების აღდგენის პროცესი გრძელდება", — განაცხადა ზუგდიდის ბიბლიოთეკების მართვის ცენტრის დირექტორმა მადონა მაქაცარიამ.

ფოტო: ეროვნული ბიბლიოთეკა

მოძრაობა ეკვილიბრიუმის მხარდამჭერია გალფი.