მუსიკალური ფესტივალის, Mountain Set-ის ორგანიზატორები ყაზბეგში საფესტივალო ტერიტორიის დარბევასთან დაკავშირებით განცხადებას ავრცელებენ და აღნიშნავენ, რომ ყველაფერს აკეთებენ, რათა ფესტივალი არ გაუქმდეს. მათივე ცნობით, ფესტივალის ახალ ლოკაციას დღეს გამოაცხადებენ.

"ფესტივალი არ გახლავთ სახელმწიფოს მიერ დაფინანსებული და მთლიანად ფინანსური უზრუნველყოფა განხორციელებულია ორგანიზატორების მიერ. ფესტივალი, რომელიც ყველა კანონის დაცვით და ყველა შესაბამის სახელმწიფო ორგანოსთან შეთანხმებითაა ორგანიზებული არ შეიძლება ჩაიშალოს ადამიანების გარკვეული ჯგუფის პირადი, არაჯანსაღი და დამამცირებელი აზრის გამო", — ნათქვამია განცხადებაში.

მათი თქმით, მომხდარი ფაქტი საფრთხეს უქმნის და აზიანებს არამხოლოდ ერთ კონკრეტულ ფესტივალს, არამედ ქვეყნის იმიჯს, სერიოზულ დარტყმას აყენებს ტურიზმს და ლახავს თითოეული მოქალაქის უფლებას.

სამწუხაროდ აქ არ ცნობენ, პატივს არ სცემენ, არ აღიარებენ სახელმწიფო ინსტიტუციებს. შესაბამისად, სამართლებრივ სახელმწიფოზე და კანონის უზენაესობაზე საუბარი ზედმეტია... ჩვენ ყველას თქვენი თანადგომა გვჭირდება ისე, როგორც არასდროს! არავის მივცეთ საშუალება, მუსიკის მოსმენის, ცეკვის და ბედნიერების გაზიარების უფლება შეგვიზღუდონ!" — აღნიშნულია განცხადებაში.

გუშინ, 24 ივნისს ყაზბეგში ადგილობრივმა მოსახლეობამ Mountain Set: Kazbegi-ს საფესტივალო ტერიტორია დაარბია. დაზიანებულია ინფრასტრუქტურა. ინფორმაციას შინაგან საქმეთა სამინისტროში ადასტურებენ.

შინაგან საქმეთა სამინისტრომ გამოძიება სისხლის სამართლის კოდექსის 177-ე და 187-ე მუხლებით დაიწყო, რაც ქურდობასა და ნივთის განადგურებას ან დაზიანებას გულისხმობს.

ამავე თემაზე: