არასამთავრობო ორგანიზაცია სამართლიანი არჩევნები მიიჩნევს, რომ 2020 წლის საპარლამენტო არჩევნების პროპორციული სისტემით ჩატარება მისასალმებელია, მაგრამ ბარიერის გაუქმება რისკებს შეიცავს. პროპორციულ სისტემაზე გადასვლისა და ბარიერის გაუქმების შესახებ დღეს, 24 ივნისს ქართული ოცნების ლიდერმა, ბიძინა ივანიშვილმა განაცხადა.

ორგანიზაციაში აღნიშნავენ, რომ საარჩევნო ბარიერის გაუქმებამ შეიძლება გამოიწვიოს დიდი რაოდენობის ძალიან მცირე მხარდაჭერის მქონე პარტიების მოხვედრა საკანონმდებლო ორგანოში. მათივე თქმით, ეს, სავარაუდოდ, უარყოფითად აისახება პარლამენტის მუშაობის ეფექტურობაზე. მათივე განცხადებით, პარლამენტში პარტიების არაგონივრულად დიდი რაოდენობის პირობებში, შესაძლოა, გართულდეს მთავრობის ფორმირება ან შეიქმნას პოლიტიკური კრიზისებისა და არასტაბილურობის საფრთხე.

"ყოველგვარი ბარიერის გარეშე არჩევნების ჩატარება გაზრდის პარტიულ ფრაგმენტაციას და გამოიწვევს ისეთი პარტიების შექმნასა და პარლამენტში მოხვედრას, რომლებსაც საპარლამენტო მუშაობაში ადეკვატურად ჩართვის რესურსი და შესაძლებლობა არ ექნებათ", — აღნიშნულია განცხადებაში და აქვე აღნიშნულია, რომ მსგავსი გამოცდიება საქართველოს 1992 წელს ჰქონდა, როცა არჩევნებზე ბარიერი არ იყო და პარტიების მასობრივად ჰქმინდნენ.

მათივე განცხადებით, პროპორციულ საარჩევნო სისტემაზე გარდამავალ პერიოდში მნიშვნელოვანია სამი პროცენტიდან 5 პროცენტამდე საარჩევნო ბარიერის არსებობა, რაც ხელს შეუწყობს პოლიტიკური პარტიების გაძლიერებას და სტაბილურობის უზრუნველყოფას.

"გვსურს, კიდევ ერთხელ ხაზი გაუსვათ იმას, რომ 2020 წლის საპარლამენტო არჩევნებისთვის პროპორციულ საარჩევნო სისტემაზე გადასვლა უმნიშვნელოვანესია ქვეყნის დემოკრატიული და მშვიდობიანი განვითარებისთვის და ამასთან, მოვუწოდოთ ხელისუფლებას ბარიერთან დაკავშირებული მსჯელობა გაგრძელდეს შესაბამის ფორმატში ყველა დაინტერესებული მხარის მონაწილეობით, რათა გააზრებული იქნას ყველა შესაძლო რისკი და მიღებული გადაწყვეტილება შესაბამისობაში იყოს ქვეყნისა და საზოგადოების საუკეთესო ინტერესებთან", — ნათქვამია განცხადებაში.