ქართული ოცნების ლიდერი, მამუკა მდინარაძე ნიკა გვარამიას პასუხობს რუსთავი 2-ში შეჭრაზე და ამბობს, რომ არანაირი სახელისუფლებო წყარო და ასეთი ინფორმაცია არ არსებობს:

"ეს არის გვარამიას ფანტაზიის ნაყოფი ან ერთი პროცენტი დავუშვათ, რომ ვიღაც აგიჟებს, აშაყირებს, რომ ასეთ ინფორმაციებს აწვდის".

ნიკა გვარამიას განცხადებას საგანგებო ბრიფინგით გამოეხმაურა ქართული ოცნების დეპუტატი არჩილ თალაკვაძეც. ქართული ოცნების ლიდერი და დეპუტატი არჩილ თალაკვაძე ამბობს, რომ აბსურდი და სიცრუეა ნიკა გვარამიას განცხადება, თითქოს, რუსთავი 2-ის აღებაზე მიმდინარეობს მსჯელობა.

ტელეკომპანია რუსთავი 2-ის გენერალურ დირექტორის თქმით, ხელისუფლება ტელევიზიის ძალადობრივად აღებას განიხილავს. მან თქვა, რომ ეს ინფორმაცია ორი წყაროსგან მიიღო, მათ შორის ერთი ხელისუფლების მაღალი რგოლის წარმომადგენელია. მისივე თქმით, შესაძლოა, გასაჯაროვდეს ჩანაწერები, რომელიც არხში შესვლის მოტივად გამოიყენონ.