ახალი პოლიტიკური ცენტრის, გირჩის ერთ-ერთმა დამფუძნებელმა, პავლე კუბლაშვილმა რუსთავი 2-ის ეთერში თქვა, რომ პარტიას პოლიტიკურ პარტნიორებში არ გაუმართლა და სწორედ ამიტომ, მათი პარტიის მაჟორიტარი დეპუტატობის კანდიდატები არჩევნებში მონაწილეობას არ მიიღებენ.

კუბლაშვილი ბურჭულაძისთვის ბიძინა ივანიშვილთან თანამშრომლობის შეთავაზებას ხაზგასმით უარყოფს და ამას "უსინდისო, მტკნარ" ტყუილს უწოდებს. მისი თქმით, ბურჭულაძეს ამით სურს სხვებს დაანახოს, რომ ბლოკში ფინანსური საკითხების გარდა კონფლიქტის სხვა მიზეზიც არსებობდა.

ის ასევე აცხადებს, რომ ბლოკში არიან ადამიანები, რომლებსაც წარმატებული პოლიტიკური კარიერა ექნებათ, მაგრამ ის პაატა ბურჭულაძეს არ უნდა დაუკავშირონ:

"ეს არის ადამიანი, რომელიც მხოლოდ საკუთარ თავზე, მხოლოდ საკუთარ ფინანსებზე ფიქრობს და პოლიტიკა მისთვის არის ფინანსური მოგების ნახვის საშუალება".

კუბლაშვილის თქმით, გირჩის მიერ ბლოკის დატოვების მთავარი მიზეზი ფინანსური პრობლემები აღმოჩნდა. მისი თქმით, ბურჭულაძემ გირჩს დამატებითი ფინანსები მოსთხოვა, წინააღმდეგ შემთხვევაში კი საპარლამენტო სიიდან მათი კანდიდატების ამოღებით დაემუქრა.

ის ასევე აცხადებს, რომ ბლოკში გაერთიანების წინადადების წამოწევა მისი მხრიდან დიდი შეცდომა იყო და ის თანაგუნდელებს ამისათვის ბოდიშს უხდის.